Velkomin í Borgó

Nemendur á þriðja ári í  grafískri hönnun hafa undanfarið unnið plaköt fyrir <a href="https://www.sim.is/torg-listamessa" target="_blank" rel="noopener">TORG Listamessu</a> sem opnar föstudaginn 4. október á Korpúlfsstöðum. Þar sýna um 40 listamenn innan SÍM, Samband íslenskra listamanna, verk sín. Einnig birtast nokkur auglýsingaplaköt, sem unnin voru af nemendum, í strætóskýlum víða um borgina. Í kaffihúsi Korpúlfsstaða verða einnig sýnd brot af þeim verkum sem nemendur í grafískri hönnun í Borgarholtsskóla hafa unnið undanfarin ár.
TORG Listamessa verður formlega opnuð föstudaginn 4. október kl. 17:00 en verður svo opin sem hér segir: 
Laugardagur 5. október 12-16 
Sunnudagur 6. október 12-16 
Laugardagur 12. október 12-16 
Sunnudagur 13. október 12-16
Nemendur hafa unnið vel undir faglegri stjórn kennara í grafískri hönnun og því um að gera að líta við á Torg Listamessu.

Nemendur fengu Hleðslu og banana í hádeginu 

Heilsuvika Borgó hefur staðið yfir alla vikuna og hefur gengið einstaklega vel. Nemendum var boðið uppá ávexti og lýsi alla morgna og í hádegishléum hafa farið fram keppnir í sippi, stigahlaupi og róðri. Á fimmtudag var svo hápunktur vikunnar og þá gátu nemendur valið sér hreyfingu í stað síðustu kennslustundanna fyrir hádegi. Hreyfingin var fjölbreytt, til að mynda var hægt að velja sér skák, zumba, handbolta, keilu, jóga, frisbígolf og spinning. Eftir hreyfinguna var nemendum boðið upp á hressingu og skemmtiatriði í matsal skólans þar sem Andri Ívarsson tróð upp.
Heilsuvikan heppnaðist mjög vel og efldi heilsuhegðun bæði nemenda og starfsfólks.
&nbsp;

Nemendur í stálsmíði í áfanganum PLV2A05 hafa unnið að því undanfarið að smíða eldstæði. Þetta verkefni felst í því að valsa plötur og velja viðeigandi rör. Nemendur teikna útflatning og skera hann út með plasmaskurðarvél. Verkefnið reynir einnig á suðukunnáttu nemenda þar sem þeir sjóða stykkin saman.
Myndin af nemendum sýnir þegar eldstæðið var prófað fyrir utan skólann og þess má geta að það virkaði nákvæmlega eins og vonir stóðu til.
Nemendur í þessum áfanga fóru einnig nýlega í vettvangsferð til Marel þar sem þau fengu að kynnast ýmsum þáttum tengdum stálssmíði svo sem beygjuvél, laserskurði, róbótasuðu, glerblæstri og samsetningu stáleininga úr ryðfríu stáli. Allar þessar vélar eru tölvustýrðar og forritanlegar en einnig sáu nemendur aðstöðuna þar sem hönnun og teikning á framleiðslunni fer fram. Heimsóknin tókst sérlega vel og voru starfsmenn Marel mjög vel undirbúnir með svör á reiðum höndum. Þeim er þakkað fyrir frábæra kynningu.

Á dögunum tók Skarphéðinn Skarphéðinsson deildarstjóri pípulagna við rausnarlegri gjöf frá lagnadeild Húsasmiðjunnar. Um er að ræða tvær beygjuvélar með tilheyrandi búnaði. Eru Húsasmiðjunni færðar kærar þakkir fyrir að standa svo rausnarlega að baki þessu mikilvæga iðnnámi.
Búnaðurinn kemur að góðum notum því aðsókn í pípulagnir var frábær nú í haust og því er hvert pláss fyllt. Umsóknartímabilið fyrir næstu önn (vorönn 2025) hefst þann 1. nóvember og stendur út mánuðinn.

Skarphéðinn Skarphéðinsson deildarstjóri pípulagna og Daníel Karl Grönvold starfsmaður lagnadeildar Húsasmiðjunnar

Styrkirnir voru veittir með viðhöfn í Höfða

Nemendafélag Borgarholtsskóla fékk á dögunum styrk úr loftslagssjóði ungs fólk. Úthlutunin fór fram í Höfða og voru það Einar Þorsteinsson borgarstjóri og Dóra Björt Guðjónsdóttir formaður umhverfis og skipulagsráðs Reykjavíkurborgar sem afhentu styrkinn, en fjölmörg önnur verkefni hlutu styrk. Loftslagssjóður ungs fólks er samstarfsverkefni Reykjavíkurborgar og Bloomberg Philanthropies. Markmið sjóðsins er að virkja ungmenni í leit að lausnum á loftslagsvandanum og styrkja ný verkefni sem vinna gegn loftslagsvánni.
Nemendafélag Borgarholtsskóla fékk styrk fyrir aukinni fræðslu um flokkun og umhverfismál. Markmiðið er að virkja nemendur til að huga betur að flokkun úrgangs, minnka matarsóun og loftslagsáhrif.
Á myndinni eru þau Edda Sóley Þórisdóttir, Dóra Björt Guðjónsdóttir, Dagmar Njarðardóttir, Guðrún Elva Kristjánsdóttir, Grétar Páll Sigursteinsson og Einar Þorsteinsson. Myndirnar eru teknar af Róberti Reynissyni og koma af Facebook síðu Reykjavíkurborgar.
<a href="https://reykjavik.is/frettir/uthlutad-ur-loftslagssjodi-ungs-folks">Nánari upplýsingar um úthlutunina er að finna á vef Reykjavíkurborgar. </a>

Edda Sóley Þórisdóttir, Dóra Björt Guðjónsdóttir, Dagmar Njarðardóttir, Guðrún Elva Kristjánsdóttir, Grétar Páll Sigursteinsson og Einar Þorsteinsson í Höfða.

Sölvi eftir hlaupið með verðlaun fyrir góðan árangur 

Bakgarðshlaup Náttúruhlaupa fór fram í Heiðmörk um helgina. Um er að ræða utanvegahlaup þar sem keppendur hlaupa sama 6,7 km hringinn þangað til einn keppandi er eftir og stendur sá uppi sem sigurvegari. Lagt er af stað í nýjan hring á heila tímanum og hafa keppendur því eina klukkustund til að hlaupa hringinn og safna orku fyrir næsta hring.
250 keppendur hófu keppni á laugardagsmorguninn. Í ár var sérstaklega spennandi að fylgjast með hlaupinu þar sem tveir brautskráðir Borghyltingar stóðu sig einstaklega vel. Þetta voru þau Sölvi Snær Egilsson og Þórhildur Vala Kjartansdóttir.
Sölvi Snær náði besta árangri í karlaflokki og hljóp alls 234,7 km eða 35 bakgarðshringi. Sölvi útskrifaðist frá skólanum 2022 af viðskipta &#8211; og frumkvöðlabraut og íþróttaakademíunni. 
Þórhildur Vala, fyrrum forseti Nemendafélags Borgarholtsskóla, útskrifaðist af málabraut og íþróttaakademíu árið 2016. Hún hljóp 11 hringi eða 75 km sem er mikil bæting hjá henni og frábær árangur.
Þessu flotta íþróttafólki er óskað innilega til hamingju með frábæran árangur.
Myndirnar koma frá <a href="https://sportmyndir.is/#/">Sportmyndir.is</a>

Í síðustu viku komu Samfélagslöggur í heimsókn í Borgarholtsskóla. Þau Birta og Unnar hittu alla nýnema skólans. Þau voru með margvíslega fræðslu um störf lögreglunnar og eftir það fengu nemendur tækifæri á að spyrja þau spurninga.
Heimsóknirnar vöktu mikla lukku og er Samfélagslöggunum þakkað kærlega fyrir innlitið.
Meðfylgjandi mynd er tekin þar sem fallega haustveðrið var nýtt í körfubolta með Unnari samfélagslöggu.

Helgina 6. og 7. september fór fram Rallý Reykjavík þar sem 36 keppendur tóku þátt á 18 bílum. Í þessum hópi voru 5 nemendur Borgarholtsskóla. Ingvi Björn Birgisson og Adam Máni Valdimarsson kepptu á Subaru Impreza en þeir settu hraðamet á leiðinni um Kaldadal og sigruðu í keppninni. Adam Máni er nýnemi í Borgarholtsskóla og varð yngsti keppandinn sem vinnur rallýkeppni á Íslandi, einungis 15 ára gamall. Einnig kepptu Karítas Birgisdóttir og Helena Ósk Elvarsdóttir en Helena Ósk er nemandi í bílamálun. Þær tryggðu sér Íslandsmeistaratitil í E1000 flokki smábíla.
Nemendum Borgarholtsskóla er óskað innilega til hamingju með frábæran árangur og augljóst að þau eiga bjarta framtíð í rallýinu.
&nbsp;

Karítas og Helena tryggðu sér Íslandsmeistaratitil

Nemendur og starfsfólk Borgarholtsskóla sýndu samhug og heiðruðu minningu Bryndísar Klöru með því að klæðast bleiku fimmtudaginn 5. september. Meðfylgjandi mynd var tekin á bílastæði skólans þar sem nemendur og starfsfólk mynduðu hjarta.
Fjölskyldu og vinum Bryndísar Klöru er vottuð innileg samúð á þessum erfiðu tímum.

Starfsfólk og nemendur mynduðu hjarta á bílastæði skólans

Vígalegir nemendur á leið í paintball

Rúmlega 400 nýnemar setjast á skólabekk í Borgarholtsskóla nú í haust. Þann 19. ágúst var nýnemadagur í skólanum þar sem nýir nemendur í dagskóla komu í hús og fengu kynningu á skólanum og þeirri fjölbreyttu þjónustu sem í boði er, t.d. námsráðgjöf, bókasafni og nemendafélagi. Því næst hittu þau umsjónarkennara sína sem kenna þeim lífsleikni og kynntust samnemendum sem munu fylgjast að á skólaárinu. Nýnemum var boðið upp á grillaðar pylsur og ís í hádeginu áður en haldið var í Skemmtigarðinn í Gufunesi þar sem nemendur skemmtu sér saman í ýmiss konar hópefli.
Seinna sama dag var kynningarfundur fyrir foreldra nýnema þar sem foreldrar komu, fengu kynningu á starfi skólans og hittu umsjónarkennara barna sinna. Var mæting afar góð, yfir 400 áhugasamir foreldrar og forráðafólk var mætt á fundinn.
Nýnemadagurinn tókst með eindæmum vel og veitti nemendum gullið tækifæri til að koma í skólann og kynnast samnemendum sínum áður en formlegt skólastarf hófst.

Nýnemar streymdu inn og fylltu matsal skólans

Nú líður að upphafi haustannar en kennsla hefst samkvæmt stundaskrá hjá nemendum í dagsskóla þriðjudaginn 20. ágúst. Stundatöflur og námsgagnalista er að finna á námsvefnum <a href="https://inna.is/">www.inna.is</a>.
<ul>
<li>Mánudaginn 19. ágúst frá kl. 9-15 er nýnemadagur. Nýnemar eru beðnir að mæta klæddir eftir veðri.</li>
<li>Mánudaginn 19. ágúst kl. 16.30 er foreldrakynning í matsal skólans fyrir foreldra nýnema.</li>
<li>Tilvonandi útskriftarnemar sem hyggja á útskrift á þessu skólaári geta komið og fengið ráðgjöf varðandi áfangaval hjá áfangastjóra og sviðstjórum eftir hádegi mánudaginn 19. ágúst og allan þriðjudaginn 20. ágúst.</li>
<li>Kennsla í málmiðngreinum og pípulögnum í kvöldskóla hefst  þriðjudaginn 20. ágúst. </li>
<li>Fyrsta dreifnámslota annarinnar fyrir nemendur á félagsvirkni- og uppeldissviði er 23.-24. ágúst.</li>
<li>Fimmtudaginn 22. ágúst kl. 17 er <a href="https://us06web.zoom.us/j/81622273728?pwd=jabg2duRCuqWGa9cNJFeOgs1hZ2u9V.1">kynningarfundur fyrir dreifnámsnemendur á zoom.</a></li>
</ul>

Í dag tóku stjórnendur Borgarholtsskóla á móti góðum gestum sem voru; Ásmundur Einar Daðason, mennta- og barnamálaráðherra, Einar Þorsteinsson, borgarstjóri, Helgi Grímsson, fræðslustjóri Reykjavíkur auk Hildar Georgsdóttur, framkvæmdastjóra þjónustusviðs FSRE og sérfræðinga ráðuneytisins.  Góðar umræður urðu um fyrirhugaða stækkun Borgarholtsskóla, uppbyggingar í Grafarvogi, samstarf Borgarholtsskóla og grunnskólanna í Grafarvogi og skólamál almennt.
&nbsp;

Magnea, Helgi, Ásmundur, Ársæll, Einar og Ásta Laufey

Aðalheiður Karen Dúadóttir tekur á móti verðlaununum

Hulda Sigurveig Helgadóttir tók á móti verðlaunum fyrir hönd dóttur sinnar, Ástu Rakelar Þrastardóttur

Hulda móðir Ástu Rakelar, Eva frönskukennari og Aðalheiður Karen

Fimmtudaginn 6. júní 2024 var móttaka á vegum franska sendiráðsins þar sem bestu nemendum í frönsku skólaárið 2023-2024 var boðið. Móttakan var haldin í Alliance Francaise.
Að þessu sinni voru það tvær stúlkur úr Borgarholtsskóla sem fengu verðlaun: Aðalheiður Karen Dúadóttir nýstúdent af náttúrufræðibraut og Ásta Rakel Þrastardóttir nýstúdent af félags- og hugvísindabraut.
Patrick le Ménès sendiráðunautur veitti verðlaunin og að því loknu var boðið upp á léttar veitingar.

Patrick Le Ménès sendiráðunautur ásamt verðlaunahöfunum

Skólameistarar leiða útskriftarnema í salinn

Skólahljómsveit Mosfellsbæjar spilaði undir stjórn Daða Þórs Einarssonar

Ásta Laufey Aðalsteinsdóttir aðstoðarskólameistari flutti annál annarinnar

Ný brautskráðir nemendur setja upp húfur

Óliver Tumi Auðunsson og Ísak Magnússon fluttu kveðjuávarp útskriftarnema

Hjörleifur Steinn Þórisson flutti ávarp 10 ára útskriftarnema

Gyða Ólafía Friðbjarnardóttir flutti ávarp 20 ára útskriftarnema

Sönghópur Borgarholtsskóla flutti tvö tónlistaratriði undir stjórn Olgu Lilju Bjarnadóttur kennara

Nemendur af félagsvirkni- og uppeldissviði

Víglundur Kári Víglundsson fékk viðurkenningu fyrir dugnað og elju í námi frá Rótarýklúbb Reykjavíkur - Grafarvogs

Snærún Ynja Hallgrímsdóttir Smith og Alexandra Ýr Harðardóttir fengu verðlaun

Lilja Sigurðardóttir og Sunna Líf Arnarsdóttir voru með hæstu einkunnir á stúdentsprófi

Ísak Magnússon fékk Menntaverðlaun Háskóla Íslands

Stefán Árni Stefánsson fékk verðlaun í bílamálun

Aðalheiður Karen Dúadóttir fékk raungreinaverðlaun Háskólans í Reykjavík

Ársæll þakkaði Daða Þór Einarssyni fyrir áratuga spilamennsku á brautskráningarathöfnum í Borgó

Brautskráning Borgarholtsskóla fór fram í Háskólabíói fimmtudaginn 30. maí 2024. Athöfninni var auk þess streymt á facebook síðu skólans af nemendum í kvikmyndagerð undir stjórn Þorgeirs Guðmundssonar kennara.
Skólahljómsveit Mosfellsbæjar spilaði undir stjórn Daða Þórs Einarssonar í salnum á meðan gestir voru að koma sér fyrir í sætum.
Ársæll Guðmundsson skólameistari setti athöfnina og byrjaði á því að kalla Daða Þór Einarssyni upp á svið þar sem honum var færður þakklætisvottur fyrir að hafa spilað við brautskráningar í Borgarholtsskóla í 20 ár eða alls 40 sinnum en Daði Þór lætur senn af störfum eftir margra ára starf sem hljómsveitarstjóri skólahljómsveitar Mosfellsbæjar. Að því loknu gaf Ársæll orðið til Nökkva Jarls Bjarnasonar kennara sem var kynnir og stýrði athöfninni.
Ásta Laufey Aðalsteinsdóttir aðstoðarskólameistari flutti annál annarinnar. 1098 nemendur stunduðu nám við skólann, 901 í dagskóla og 197 í dreifnámi. Í bóknámi voru 260 nemendur, í iðn- og starfsnámssviði voru 567 nemendur, í listnámi voru 139 nemendur og á undirbúnings- og sérnámssviði voru 132 nemendur. Ásta Laufey fór yfir það helsta sem gerst hefur á önninni, bæði í hinu formlega skólastarfi og hjá Nemendafélagi skólans sem staðið hefur sig mjög vel.
Sönghópur Borgarholtsskóla flutti tvö tónlistaratriði undir stjórn Olgu Lilju Bjarnadóttur kennara. Fyrra lagið sem þau fluttu var Fallegur dagur &#8211; lag og texta Bubba Morthens. Hið síðara var Vikivaki, lag Valgeirs Guðjónssonar við texta Jóhannesar úr Kötlum.
Ársæll og Ásta Laufey sáu um brautskráningu nemenda ásamt sviðsstjórum en 119 nemendur voru brautskráðir af flestum námsbrautum skólans og sumir útskrifuðust af fleiri en einni braut. Öllum útskriftarnemum var afhent birkiplanta til gróðursetningar en það er hefð sem var innleidd á fyrstu árum skólans. Fjölmörg verðlaun og viðurkenningar voru veitt fyrir frábæran námsárangur og skólasókn. Lilja Sigurðardóttir og Sunna Líf Arnarsdóttir voru með hæstu einkunnir á stúdentsprófi en þær útskrifuðust báðar af  listnámsbraut með leiklist sem kjörsvið.
Óliver Tumi Auðunsson og Ísak Magnússon fluttu kveðjuávarp útskriftarnema en þeir brautskráðust báðir af listnámsbraut með kvikmyndagerð sem kjörsvið. Ávarp 10 ára útskriftarnema flutti Hjörleifur Steinn Þórisson sem útskrifaðist af félagsfræðibraut árið 2014. Gyða Ólafía Friðbjarnardóttir flutti ávarp 20 ára útskriftarnema en hún útskrifaðist úr bifvélavirkjun árið 2004.
Ársæll Guðmundsson flutti kveðjuorð til brautskráðra nemenda þar sem hann lagði út af ást og kærleika, siðferði, hraðanum í samfélaginu og hvað það er sem mótar hugsanir einstaklinga.
Velunnurum skólans var þakkað fyrir þeirra framlag til skólastarfsins. Starfsfólki Borgarholtsskóla var þakkað fyrir samstarfið á skólaárinu. Einnig var öllum þeim, sem með einum eða öðrum hætti, komu að framkvæmd og skipulagningu brautskráningarinnar færðar sérstakar þakkir.
Að lokum var nemendum óskað velfarnaðar og góðs gengis í að ná sínum markmiðum, auk þess sem þeim var þakkað fyrir þeirra skerf til skólans.
Fleiri myndir frá athöfninni eru á <a href="https://www.facebook.com/Borgarholtsskoli" target="_blank" rel="noopener">facebook síðu skólans</a>.

Brautskráðir nemendur og skólameistarar

Marta María sýnir nemendum saumastofuna

Nemendur í áfanganum hússtjórn- og matreiðsla á félagsvirkni- og uppeldissviði fóru nýlega ásamt kennara sínum, Hildi Margréti, í heimsókn í Hússtjórnarskólann í Reykjavík. Þar fengu nemendur fræðslu og kynningu á starfsemi skólans. Kennsla er í ýmsum fögum í skólanum sem snúa að hússtjórn og handiðn auk þess sem nemendur læra undirstöðuatriði í næringarfræði.
Nemendur fengu að ganga um skólann ásamt skólameistaranum Mörtu Maríu Arnarsdóttur og fengu að sjá hluta af afrakstri vetrarins hjá nemendum Hússtjórnarskólans svo sem vefnað, saumuð föt og lopapeysur.
Hússtjórnarskólanum og Mörtu Maríu er þakkað kærlega fyrir höfðinglegar móttökur en greinilegt er að í Hússtjórnarskólanum er fjölbreytt og skemmtilegt starf unnið.

Föstudaginn 24. maí barst pípulagningadeild Borgarholtsskóla gjöf frá <a href="https://www.tengi.is/">Tengi</a>. Um er að ræða útvíkkunarvélar sem notast er við í kennslu í áfanga um neysluvatn. Pípulagningadeildinni hefur áður borist gjöf frá Tengi en þá voru það rör í rör kerfi en þessar útvíkkunarvélar verða notaðar til að setja það saman.
Tengi er þakkað kærlega fyrir gjöfina og að styðja við kennslu í pípulögnum.

Skarphéðinn Skarphéðinsson deildarstjóri veitir gjöfinni viðtöku úr hendi Björns Ágústar Björnssonar. Á myndinni er einnig Magnús Þór Guðmundsson kennari. 

Bíliðngreinadeild Borgarholtsskóla fékk á dögunum gjöf frá<a href="https://rettjoa.is/"> Réttingaverkstæði Jóa</a>. Þar er um að ræða body hluta sem munu nýtast vel við kennslu í biðfreiðasmíði sem og bílamálun.
Það er dýrmætt fyrir Borgarholtsskóla að vera í góðu sambandi við fyrirtæki í atvinnulífinu og er Réttingaverkstæði Jóa þakkað kærlega fyrir gjöfina.

Fimmtudaginn 16. maí var afhentur landsliðsstyrkur Borgarholtsskóla. Sex nemendur hlutu styrk að þessu sinni fyrir landsliðsverkefni á vorönn 2024.
Styrkhafar eru: 
Elísa Dís Sigfinnsdóttir &#8211; HM með U18 landsliðinu í íshokkí &#8211; lenti í 2. sæti. 
María Kristín Ólafsdóttir &#8211; keppti í skíðagöngu á ólympíuleikum ungmenna í Suður-Kóreu &#8211; lenti í 59.sæti í sprettgöngu og 54.sæti í hefðbundinni göngu. 
Viktor Jan Mojzyszek &#8211; HM með U18 landsliði í íshokkí &#8211; enduðu í 4. sæti. 
Stefán Fannar Hallgrímsson &#8211; keppti fyrir Íslands hönd í  Jiu-jitsu á ADCC bæði í Danmörku og Finnlandi, náði í silfur og brons verðlaun í Finnlandi. 
Auður Bergrún Snorradóttir &#8211; æfingaferð með landsliðinu í golfi til Hacienda á Spáni.
Meðfylgjandi mynd var tekin þegar styrkhafar tóku við styrknum en á myndinni er einnig Þórdís María Aikman, verkefnastjóri íþróttaakademíu. 
Styrkhöfum er óskað innilega til hamingju með styrkinn og árangurinn á önninni.

Fimmtudaginn 16. maí fóru nemendur í áfanganum Mörkun (GRH2B05) í heimsókn á Listasafn Reykjavíkur ásamt kennara sínum, Ragnhildi Ragnarsdóttur. Þar stendur nú yfir útskriftarsýning nemenda LHÍ  í hönnun, arkitektúr og myndlist. Heimsóknin var mjög vel heppnuð og nemendur hæstánægðir.

Lokaverkefni nemenda á þriðja ári í kvikmyndagerð voru frumsýnd í Bíó Paradís laugardaginn 11. maí. Það voru 8 nemendur sem sýndu verk sín en þau eru unnin undir stjórn Þorgeirs Guðmundssonar, Þiðriks Christians Emilssonar, Kristínar Maríu Ingimarsdóttur og Curver Thoroddsens kennara á listnámsbraut.
Sýndar voru myndirnar:
Dans á rósum &#8211; Íris Þöll Hróbjartsdóttir 
Gísli gísl &#8211; Óliver Tumi Auðunsson 
Skuggi &#8211; Orri Guðmundsson 
Blóðhefnd &#8211; Reynir Snær Skarphéðinsson 
Leitin að Ásgarði &#8211; Símon Gabríel Gunnarsson 
Sápa &#8211; Ísak Magnússon 
Fundur &#8211; Árni Snorrason 
Palli og Elmar skíta uppá bak &#8211; Elmar Sölvi Steinarsson
&nbsp;
Nemendum og kennurum er óskað kærlega til hamingju með frábærar myndir og góða vinnu.

Kristín María, Kristín Þóra og Ragnhildur fengu einnig blóm að gjöf frá skólanum og Kristín María þakkaði nemendum fyrir samstarfið

Ársæll Guðmundsson skólameistari ávarpaði samkomuna

Guðný María sviðsstjóri listnáms þakkaði gestum komuna og hrósaði nemendum og kennurum fyrir sýninguna

Þriðjudaginn 7. maí var opnuð útskriftarsýning nemenda í grafískri hönnun í Borgarbókasafni menningarhúsi í Spönginni. Þar voru sýnd fjölbreytt og vönduð verkefni nemenda sem þau hafa unnið í námi sínu í Borgarholtsskóla. Einnig voru til sýnis portfolio möppur nemenda þar sem er yfirlit yfir verk þeirra.
Verkefnin hafa nemendur unnið undir styrkri stjórn kennara í grafískri hönnun, Kristínar Maríu Ingimarsdóttur, Kristínar Þóru Guðbjartsdóttur og Ragnhildar Ragnarsdóttur. Þær eiga mikið lof skilið fyrir vinnu sína með nemendum.
Nemendum og kennurum er óskað innilega til hamingju með glæsilega sýningu. Sýningin stendur til 23. maí og eru öll hvött til þess að leggja leið sína á bókasafnið og virða fyrir sér afraksturinn.

Nemendur fengu rós að gjöf frá skólanum

Apollo, leikfélag Borgarholtsskóla, undirbýr nú sýningar á leikritinu Andlát við jarðarför. Leikritið fjallar um jarðarför sem breytist í algjöran hrærigraut af fjölskylduleyndarmálum en í grautinn blandast svo ofskynjunarlyf, óþolandi gömul frænka, hrokafullur bróðir og dularfullur gestur úr fortíðinni. Sýningin er sett upp í Hlöðunni og verða þrjár sýningar föstudaginn 10. maí, laugardaginn 11. maí og sunnudaginn 12. maí. Leikstjóri er Höskuldur Þór Jónsson.
Nemendur hafa lagt mikla vinnu í að undirbúa bráðskemmtilega sýningu og eru öll hvött til þess að sjá sýningu leikfélagsins. <a href="https://www.midix.is/en/andlat-vid-jardarfor-12-may-2024/eid/287/group/1">Hægt er að nálgast miða á Midix.is.</a>

Starfsfólki gefin súkkulaðikaka í kveðjugjöf

Tilvonandi útskriftarnemar Borgarholtsskóla vorið 2024 dimmiteruðu föstudaginn 3. maí.
Nemendur borðuðu morgunmat með starfsfólkinu og færðu því súkkulaðiköku að kveðjugjöf. Nemendurnir fóru svo í miðbæinn þar sem farið var í ratleik og í önnur ævintýri. Nemendur voru í fjölbreyttum búningum að vanda en þar mátti finna Svamp Sveinsson, men in black, nunnur og kúreka.
Það er alltaf ljúfsárt að kveðja útskriftarnemendur en svona flottur hópur á framtíðina fyrir sér. Þeim er þakkað kærlega fyrir að augða okkar skólasamfélag síðustu ár.

<div class="html-div xe8uvvx xdj266r x11i5rnm xat24cr x1mh8g0r xexx8yu x4uap5 x18d9i69 xkhd6sd x6ikm8r x10wlt62">
<div class="html-div xe8uvvx xdj266r x11i5rnm xat24cr x1mh8g0r x1tlxs6b x1g8br2z x1gn5b1j x230xth x14ctfv x1okitfd x1k4qllp x6ikm8r x10wlt62 x1y1aw1k xwib8y2 x1ye3gou xn6708d x1n2onr6 x1vjfegm x1mzt3pk x13faqbe x1xr0vuk x1jm4cbz x1lmq8lz xrrpcnn x1xtl47e x13fuv20 xu3j5b3 x1q0q8m5 x26u7qi x19livfd x2t687o x3p3xfz x5od304" role="presentation">
<div class="html-div xe8uvvx xexx8yu x4uap5 x18d9i69 xkhd6sd x1gslohp x11i5rnm x12nagc x1mh8g0r x1yc453h x126k92a x18lvrbx" dir="auto">Nemendur Borgarholtsskóla kepptu nýverið í fyrirtækjasmiðju Ungra Frumkvöðla. Þar gefst nemendum tækifæri að skapa sín fyrirtæki byggð á áhuga þeirra, með hliðsjón af heimsmarkmiðum SÞ en þetta verkefni er unnið undir stjórn Unnar Gísladóttur kennara. Þetta vormisseri tóku tíu fyrirtæki þátt fyrir hönd skólans og tvö þeirra komust í úrslit.</div>
<div class="html-div xe8uvvx xexx8yu x4uap5 x18d9i69 xkhd6sd x1gslohp x11i5rnm x12nagc x1mh8g0r x1yc453h x126k92a x18lvrbx" dir="auto">Um 120 fyrirtæki kepptu frá fjölmörgum framhaldsskólum landsins og fóru þrjátíu þeirra í úrslit. Frá Borgó voru það fyrirtækin Máltak og Fókus sem komust áfram. Bæði fyrirtækin voru með samfélagslega nýsköpun og íslenskt mál og málvitund að leiðarljósi. Máltak er hugsað sem app til að kynnast íslenskum orðatiltækjum og slangurorðum. Fókus er fyrirtæki sem framleiðir samstæðuspil þar sem börn eru hvött áfram gegnum leik til að para saman íslensk orð við annað hvort pólsk eða úkraínsk orð.</div>
<div dir="auto"></div>
<div class="html-div xe8uvvx xexx8yu x4uap5 x18d9i69 xkhd6sd x1gslohp x11i5rnm x12nagc x1mh8g0r x1yc453h x126k92a x18lvrbx" dir="auto">Nemendum og Unni er óskað kærlega til hamingju með árangurinn á önninni og er Borgarholtsskóli heppinn að eiga svo flotta fulltrúa skólans í keppninni.</div>
</div>
</div>
<div class="html-div xe8uvvx xdj266r x11i5rnm xat24cr x1mh8g0r xexx8yu x4uap5 x18d9i69 xkhd6sd x1h91t0o xkh2ocl x78zum5 xdt5ytf x13a6bvl x193iq5w x1iyjqo2 x1eb86dx" role="presentation"></div>

Útskriftarnemar leiklistarkjörsviðs Borgarholtsskóla ásamt kennurum sínum hafa unnið hörðum höndum að því undanfarna mánuði að setja upp söngleikinn Kabarett. Söngleikurinn gerist í Berlín á árunum 1929-1930 í rökkri jazzaldar þegar nasistar rísa til valda. Verkið fjallar um næturlífið á Kitkat-klúbbnum og samskipti bandaríska rithöfundarins Clifford Bradshaw við ensku kabarettleikkonuna Sally Bowles.
Tvær sýningar voru sýndar af verkinu fyrir fullu húsi í Gamla bíói 28. og 29. apríl. Guðný María Jónsdóttir, Guðmundur Elías Knudsen, Eva Björg Harðardóttir og Olgalilja Bjarnadóttir hafa stýrt og aðstoðað nemendur við þessa flóknu og vönduðu uppsetningu.
Nemendum og kennurum er óskað innilega til hamingju með þessa glæsilegu sýningu og ljóst er að framtíðin er björt hjá þessum nemendum.

Miðvikudaginn 17. apríl fór fram árleg hæfileikakeppni sérnámsbrautar. Sex nemendur tóku þátt og stóðu þau sig öll frábærlega. Linda María Arnarsdóttir varð í fyrsta sæti, Baltasar Bertil Davíðsson í öðru og Alex Halldórsson í því þriðja. Dómarar voru Ásta Laufey aðstoðarskólameistari, Kristín Birna námsráðgjafi og Guðrún Sigurðardóttir kennari á sérnámsbraut.
&nbsp;

Unnur Gísladóttir kennari ásamt nemendum með fyrirtækið Hiti

Vörumessa ungra frumkvöðla fór fram í Smáralind dagana 12.-13. apríl. Það voru um 600 nemendur frá 14 skólum sem tóku þátt. Nemendurnir kynntu um 130 fyrirtæki sem þau hafa stofnað og seldu vörur sínar og þjónustu. Áslaug Arna Sigurbjörnsdóttir ráðherra háskóla, iðnaðar og nýsköpunar setti Vörumessuna en Ásmundur Einar Daðason afhenti viðurkenningar fyrir frumlegasta sölubásinn og öflugasta sölustarfið í lok dags á laugardaginn. Tíu fyrirtæki frá nemendum Borgarholtsskóla tóku þátt í ár en það voru:
Hiti: Framleiða sterkt poppkorn 
Fíll: App sem heldur utan um inneignir og gjafabréf 
Eneka: Tækifæriskort úr umhverfisvænum efnum 
Fókus: Samstæðuspil fyrir börn af pólskum/úkraínskum uppruna 
Máltak: App sem veitir upplýsingar um íslensk orðasambönd og slettur 
Nótan: Heldur utan um kvittanir frá fyrirtækjum allt á sama stað 
Sönn: Flöskupokar úr hampi 
Varmey: Hitapokar með grjónum fyrir gigtveika 
Myrkur: Framleiða hettupeysur með endurskini 
Makrós: Framleiða prótein gúmmíbangsa
Nemendur Borgarholtsskóla stóðu sig frábærlega í að kynna vörur sínar og þjónustu en þau hafa undirbúið þessa sýningu alla önnina undir stjórn Unnar Gísladóttur, kennara. Unni og nemendum hennar er óskað innilega til hamingju með afraksturinn og sýninguna.
&nbsp;

Fíll er app sem heldur utan um inneignir og gjafabréf

Kór Borgarholtsskóla söng fyrir gesti inni í stofu

Opið hús fór fram í Borgarholtsskóla 10. apríl. Þar gafst fólki kostur á að kynna hið fjölbreytta nám sem er í boði í skólanum, félagslíf hans og skólabrag. Opna húsið var sérstaklega ætlað nemendum sem útskrifast úr grunnskóla í vor og forráðafólki þeirra.
Nemendur skólans fylgdu gestum í hópum um skólahúsnæðið þar sem aðstaðan var sýnd og fjölmörgum spurningum svarað. Gestir komu víða við og fengu tækifæri til að ræða við nemendur og kennara um nám og kennslu á hinum ýmsu brautum skólans.
Nemendur og forráðafólk staldraði einnig við í matsalnum þar sem kennarar, sviðsstjórar, nemendur og fulltrúar stoðþjónustu voru til taks til að ræða allt sem tengist náminu við skólann. Nemendur á þriðja ári á leiklistarkjörsviði sýndu svo atriði úr Kabarett sem er söngleikur sem þau setja upp um þessar mundir.
Fjölmargir lögðu leið sína í skólann og er óhætt að segja að skólahúsnæðið hafi iðaði af lífi.
&nbsp;

Í haust verður boðið upp á nýja námleið til stúdentsprófs í Borgarholtsskóla. Heilsu- og lífsstílsbraut hentar vel þeim sem hafa mikinn áhuga á íþróttum og heilsu og hafa í gegn um tíðina stundað hreyfingu sér til ánægju og heilsubótar. Nemendum gefst kostur á að auka hæfni sína og þekkingu á sviðinu ásamt því að hljóta góða og gagnlega almenna menntun til stúdentsprófs. Almennur kjarni er 99 einingar, þriðja mál (val um þýsku eða frönsku) 20 einingar og sérgreinar brautarinnar 86 einingar, alls 205 einingar. Sérgreinarnar í kjarna og kjörsviði samanstanda af fjölbreyttum fögum svo sem íþróttafræði, þjálf-fræði, íþróttasálfræði, líffæra- og lífeðlisfræði og næringarfræði. Í sérstökum HHH áföngum – Heilsa, hreyfing og hreysti – er blandað saman verklegum æfingum og faglegri umfjöllun um heilsu- og lífsstílstengd efni.
Almenn inntökuskilyrði á bóknámsbrautir til stúdentsprófs gilda fyrir nýju brautina. <a href="https://www.borgo.is/skolinn/inntokuskilyrdi">Hér má finna upplýsingar um inntökuskilyrðin</a>.
Námið er kjörið fyrir þá sem hafa hug á að stunda nám í heilsutengdum greinum, heilbrigðisgreinum, félagsgreinum og raungreinum og veitir það ákjósanlegan undirbúning fyrir tengd störf, svo sem við læknisfræði, hjúkrun, íþróttaþjálfun, kennslu og ráðgjöf. Nemendur geta í samráði við náms- og starfsráðgjafa skólans lagað kjörsviðsval sitt að inntökuskilyrðum þeirrar námsleiðar sem þau vilja feta í áframhaldandi námi.
Jafnframt vinnu við uppbyggingu nýrrar brautar er unnið að breytingum á íþróttaakademíu skólans (áður afreksíþróttasvið) sem miða að því að straumlínulaga námið og taka inn þá sérhæfðu námsáfanga sem kenndir verða á heilsu- og lífsstílsbrautinni.

Í vor fer fram raunfærnimat í Borgarholtsskóla. Þá gefst fólki með umtalsverða reynslu úr atvinnulífinu kostur á að fá þá hæfni sem það hefur öðlast í starfi metna upp í áfanga á verk- og starfsnámsbrautum skólans. Sótt er um að komast í matið á vef skólans og fer það þannig fram að umsækjandi mætir í viðtal hjá náms- og starfsráðgjafa þar sem farið er yfir starfsreynslu viðkomandi. Að viðtalinu loknu fer fram sjálfsmat undir handleiðslu ráðgjafa og sérfræðinga í faginu sem um ræðir. Loks fer fram matssamtal þar sem farið er yfir hæfni þátttakanda gagnvart hæfniviðmiðum þeirra áfanga sem sjálfsmatið hafði bent til að ástæða væri til að meta.
Að matinu loknu getur þátttakandi sótt um að ljúka náminu við þá framhaldsskóla sem bjóða upp á viðkomandi námsgrein. 
Nánari upplýsingar og umsóknareyðublað um raunfærnimat er að finna <a href="https://www.borgo.is/namid/raunfaernimat">hér</a>. Ef spurningar vakna má hafa samband við Söndru Hlín Guðmundsdóttur, náms og starfsráðgjafa. Best er að skrifa henni tölvupóst á <a href="mailto:sandra.gudmundsdottir@borgo.is">sandra.gudmundsdottir@borgo.is</a> eða hringja í síma 535 1700.

Miðvikudaginn 20. mars fór fram Frönskufestival í tilefni af 50 ára afmæli félags frönskukennara og alþjóðlegum degi franskrar tungu í Veröld &#8211; Húsi Vigdísar. Eva Leplat frönskukennari sótti hátíðina ásamt Ástu Rakel Þrastardóttur nemanda í frönsku. Ásta Rakel tók þátt í myndbandasamkeppni frönskunemanda af því tilefni. Ásta fékk sérstakt hrós frá fulltrúa sendiráðs, Renaud Durville, fyrir flott myndband.

Ásta Rakel ásamt fulltrúa sendiráðs Frakklands

Kvikmyndahátíð framhaldsskólanna fór fram um síðustu helgi og varð nemandi frá Borgó hlutskarpastur í keppninni. Óliver Tumi Auðunsson, nemandi í kvikmyndagerð, fékk fyrstu verðlaun fyrir myndina <a href="https://youtu.be/OI4pRUZzIDM?si=ZOibNzh_5h9ExlFv">Guðni</a>. Nemendur Borgarholtsskóla hafa verið áberandi í keppninni frá upphafi en kvikmyndahátíð framhaldsskólanna fagnaði 10 ára afmæli um helgina. Reynir Snær Skarphéðinsson nemandi í kvikmyndagerð fékk einnig verðlaun sem og Jun Gunnar Lee Egilsson sem er fyrrum nemandi Borgarholtsskóla.
Óliver Tuma og öðrum verðlaunahöfum er óskað innilega til hamingju með sigurinn.
Verðlaunahafar KHF árið 2024 voru:
Besta Stuttmynd – „Guðni“. Leikstjóri: Óliver Tumi Auðunsson
Besta Handrit – „Guðni“, eftir Óliver Tuma Auðunsson
Besta Myndataka – Jun Gunnar Lee Egilsson og Reynir Snær Skarphéðinsson fyrir myndatöku í „Að elta kanínu“
Besta Tæknilega útfærsla – „Að elta kanínu“. Leikstjóri: Jun Gunnar Lee Egilsson
Besti leikur – Salka Björnsdóttir fyrir leik sinn í Kjallarinn
Hildarverðlaunin fyrir bestu tónlist – Árni Björn Þórisson fyrir tónlistina í „Að elta kanínu“
Áhorfendaverðlaun Laugardags – „Hamskipti“. Leikstjóri: Patrekur Thor
Áhorfendaverðlaun Sunnudagur – „Fína lífið“. Leikstjórar: Axel Sturla Grétarsson og Haukur Már Birgisson

Ísak Magnússon og Óliver Tumi Auðunsson taka við verðlaunum

Löggurnar ræddu við nemendur í matsalnum

Nemendur gátu sent inn nafnlausar spurningar

Nemendur fengu að skoða búnað og tæki lögreglunnar

Þriðjudaginn 19. mars komu <a href="https://www.instagram.com/samfelagsloggur/">Samfélagslöggur</a> í heimsókn í Borgarholtsskóla. Þau ræddu við nemendur um allt milli himins og jarðar, útskýrðu verkefni og störf lögreglunnar ásamt því að svara spurningum nemenda. Markmið lögreglunnar með Samfélagslöggum er að færa lögregluna nær samfélaginu og styrkja tengsl lögreglunnar við ungt fólk.
Samfélagslöggur komu mjög vel fyrir og áttu gott spjall við nemendur skólans. Þeim er þakkað kærlega fyrir komuna í skólann.
<h1 class="_ap3a _aaco _aacu _aacx _aad6 _aade" dir="auto"></h1>

<div>
Borgarholtsskóli og Goethe Institut hafa gert með sér samnig um áframhaldandi samstarf á sviði þýskukennslu. Samningurinn kveður á um að Borgarholtsskóli sé svokallaður PASCH skóli, einn af 2000 slíkum á heimsvísu og sá eini á Íslandi. PASCH verkefnið er unnið að frumkvæði Utanríkisráðuneytis Þýskalands og Menningarmálaráðuneytisins sem og Goethe Institut.
</div>
<div>
Samningurinn veitir okkur aðgang að sérfræðiþekkingu og urmul af efni um allt er varðar þýskukennslu og menningu þýskumælandi landa. Einnig veitir samningurinn okkur forgang að námskeiðum, skiptinámi og stað/og netnámi fyrir nemendur okkar og starfsfólk.
</div>
<div>
Skólinn er að auki með þessum samning sá aðili á Íslandi sem hefur réttindi til að halda alþjóðleg þýskupróf fyrir nemendur annara framhaldsskóla á Íslandi, sem og fyrir alla þá sem þessi próf vilja taka, sem eru alla jafna frumforsenda þess að geta starfað eða numið í þýskumælandi löndum.
</div>
<div>
Sophie Nadolski, kennslusérfræðing/ráðgjafa í þýsku við Goethe Institut í Kaupmannahöfn er okkar tengiliður við verkefnið.
</div>
<div>
Með samningnum tryggjum við forystu skólans hvað varðar tungumála- og menningartengsl við hinn þýskumælandi heim.
<div id="attachment_4546" style="width: 310px" class="wp-caption aligncenter"><a href="https://www.goethe.de/en/index.html" target="_blank" rel="noopener"><img aria-describedby="caption-attachment-4546" loading="lazy" decoding="async" class="wp-image-4546 size-medium" src="https://wp.borgo.is/wp-content/uploads/GI_Logo_inkl_Claim_horizontal_green_sRGB-300x140.jpg" alt="Logo Goethe Institut" width="300" height="140" srcset="https://wp.borgo.is/wp-content/uploads/GI_Logo_inkl_Claim_horizontal_green_sRGB-300x140.jpg 300w, https://wp.borgo.is/wp-content/uploads/GI_Logo_inkl_Claim_horizontal_green_sRGB-1024x479.jpg 1024w, https://wp.borgo.is/wp-content/uploads/GI_Logo_inkl_Claim_horizontal_green_sRGB-768x359.jpg 768w, https://wp.borgo.is/wp-content/uploads/GI_Logo_inkl_Claim_horizontal_green_sRGB.jpg 1413w" sizes="(max-width: 300px) 100vw, 300px" /></a>Logo Goethe Institut</div>
</div>

Magnús Matthíasson þýskukennari, Sophie Nadolski yfirmanneskja tungumálasviðs Goethe Institut í Kaupmannahöfn og Ársæll skólameistari

Verkfærin eru öll einangruð en framleiðendur gera kröfu um að slík verkfæri séu notuð þegar unnið er við rafbíla

Varúðarmerkingar eru meðal þess sem finna má í verkfæraskápnum

Fyrir skemmstu barst skólanum höfðingleg gjöf frá <a href="http://www.sindri.is">Sindra</a>. Um er að ræða fullbúinn verkfæraskáp frá þýska verkfæraframleiðandanum Kraftwerk. Eru verkfærin hönnuð til vinnu við rafbíla og eru þau sérstaklega einangruð þannig að sem minnst hætta skapist við vinnuna en eins og kunnugt er þarf að gæta sérstakrar varúðar við slíka vinnu þar sem spennan á rafkerfi bílanna er mjög há. Með settinu fylgdu staurar og varúðarborðar sem nota á til að afmarka vinnusvæði þar sem unnið er við rafbíla.
Sigurður Kristinsson, sölumaður hjá fyrirtækinu afhenti gjöfina og tóku þau Ársæll skólameistari, Marín sviðsstjóri verk- og starfsnáms og Hreinn Ágúst kennari í rafbílaviðgerðum við henni fyrir hönd skólans. Verðmæti gjafarinnar er um hálf milljón  króna og færum við Sindra hjartans þakkir fyrir höfðinglega gjöf.

Ársæll skólameistari veitir gjöfinni viðtöku úr hendi Sigurðar frá Sindra, Marín sviðstjóri og Hreinn Ágúst kennari í bifvélavirkjun standa ánægð hjá

Jafnréttisdagur Borgó var haldinn hátíðlegur 8. mars á alþjóðlegum baráttudegi kvenna. Dagskrá var í tilefni dagsins en Drífa Snædal, talskona Stígamóta, kom og var með fyrirlestur um ólíkar birtingarmyndir ofbeldis í samböndum og samskipti ungs fólks. Eftir fyrirlestur Drífu kom Gugusar og flutti nokkur lög í matsal skólans.
Jafnréttisdagurinn var mjög vel heppnaður og er jafnréttisnefnd skólans er þakkað sérstaklega fyrir skipulagningu dagsins. Jafnréttisnefnd skipa Anton Már Gylfason, áfangastjóri, Sandra Hlín Guðmundsdóttir, náms- og starfsráðgjafi og Karen Ösp Birgisdóttir, kennari.

Þriðjudaginn 5. mars fór fram verðlaunaafhending vegna Stærðfræðikeppni grunnskólanna sem fór fram í Borgarholtsskóla. Þar öttu kappi nemendur í efstu bekkjum grunnskóla (8.-10.). Keppnin fór fram 27. febrúar en 114 nemendur úr átta skólum tóku þátt. Af þessum nemendum voru 40 í 10. bekk, 35 í 9. bekk og 39 í 8. bekk. Íris Elfa Sigurðardóttir, stærðfræðikennari við Borgarholtsskóla, hafði umsjón með keppninni í ár líkt og undanfarin ár.
Nemendum sem lentu í 10 efstu sætunum í hverjum bekk var boðið á verðlaunaafhendingu í Borgarholtsskóla ásamt kennurum og forráðafólki. Fengu allir nemendur gjafabréf á Hamborgarabúllu Tómasar auk þess sem nemendur í þriðja sæti fengu brúsa frá Borgarholtsskóla, nemendur í öðru sæti reiknivélar frá Heimilistækjum og nemendur í fyrstu sætunum fengu heyrnatól frá Opnum kerfum.
Nemendur í þremur efstu sætum:
10. bekkur 
1. Sara María Ingólfsdóttir Lágafellsskóla 
2. Egill Aðalgeir Bjarnason Ingunnarskóla 
3. Snædís Jökulsdóttir Árbæjarskóla
9. bekkur 
1. Einar Helgi Dóruson Árbæjarskóla 
2. Styrmir Tryggvason Árbæjarskóla 
3. Sigurður Orri Óskarsson Lágafellsskóla
8. bekkur 
1. Steinar Kári Jónsson Kvíslarskóla 
2. Elísabet Jóna Runólfsdóttir Seljaskóla 
3. Sigurþór Örn Gunnarsson Ingunnarskóla
Nemendum er óskað innilega til hamingju með árangurinn og Írisi Elfu og nemendum hennar þakkað sérstaklega fyrir sína vinnu við keppnina.
&nbsp;

Félagi enskukennara á Íslandi (FEKÍ) heldur árlega smásagnakeppni fyrir framhaldsskólanema. Hafa nemendur Borgarholtsskóla oft átt góðu gengi að fagna í keppninni. Í ár var engin breyting þar á því Hugrún Vigdís Viktor Hákonar, nemandi á þriðja ári í grafískri hönnun við skólann, lenti í öðru sæti á landsvísu. Verðlaunaafhending fór fram á Bessastöðum 26. febrúar síðastliðinn og var þessi mynd af Hugrúnu og Eliza Reid, forsetafrú, tekin af því tilefni. Hugrúnu er óskað innilega til hamingju með frábæran árangur!

Pálmar með fyrirlestur um jákvæð samskipti

Fimmtudaginn 22. febrúar hélt Pálmar Ragnarsson fyrirlestur fyrir nemendur. Fyrirlesturinn var í boði foreldarfélags skólans.
Pálmar Ragnarsson er reyndur fyrirlestari en áherslur hans snúa að því að auka jákvæðni í samskiptum og mikilvægi hvatningar og hróss. Vel var mætt á fyrirlesturinn og mikil ánægja með hann.
Pálmari er þakkað kærlega fyrir komuna og ánægjulegan og skemmtilegan fyrirlestur.

María Kristín Ólafsdóttir, nemandi á afrekssviði, keppti á Vetrarólympíuleikum ungmenna í Gangwon í Suður Kóreu  í lok janúar. Aðstæður til keppni voru frábærar og veðrið gott.
29. janúar tók María Kristín þátt í sprettgöngu en þar endaði hún í 59. sæti af 79 keppendum. 30. janúar keppti hún svo í klassískri skíðagöngu, 7,5 km en þar náði hún 54. sæti af 76 keppendum.
Maríu Kristínu er óskað kærlega til hamingju með árangurinn á leikunum. Hún er flottur fulltrúi Borgarholtsskóla.
<a href="https://www.isi.is/frettir/frett/2024/01/29/Hjalti-og-Maria-Kristin-kepptu-i-dag-a-YOG/">Myndin er frá heimasíðu ÍSÍ.</a>

María Kristín á Vetrarólympíuleikum ungmenna

Síðastliðna helgi fór fram sveinspróf í vélvirkjun sem haldið var hér í Borgarholtsskóla. Ellert Daníelusson og Markús G. Sveinbjarnarson héldu utan um framkvæmd prófsins. 18 nemendur tóku prófið en 8 nemendur voru frá Borgarholtsskóla. Aldrei hafa jafn margar konur þreytt sveinspróf í vélvirkjun í einu en þrjár konur tóku prófið. 3 nemar komu frá Vestmannaeyjum sem sóttu um að taka það í Borgarholtsskóla vegna góðrar aðstöðu í skólanum.
Prófið gekk vel og nemum er óskað til hamingju með það að hafa klárað sveinspróf.
&nbsp;

Veislustjórar kvöldsins Aron Már og Arnar Þór

Nökkvi Jarl kennari í leiknum Veistu hver ég er

Fimmtudagskvöldið 8. febrúar var haldið Glæsiball í Borgarholtsskóla en svo nefnist árshátíð nemenda skólans.
Glæsiballið fór að venju fram í matsal skólans. Starfsfólk þjónaði nemendum til borðs en á boðstólnum var kalkúnn með öllu tilheyrandi og súkkulaðimús í eftirrétt. Veislustjórar voru Aron Mola og Arnar Þór Ólafsson en þeir héldu uppi góðu stuði. Einnig kom Vilhelm Anton Jónsson, betur þekktur sem Villi Naglbítur, fram og tók nokkur lög við góðar undirtektir. Sýnd voru myndbönd frá BARA nefndinni og grínmyndband frá starfsfólki auk þess sem haldin var hæfileikakeppnin Borgó got talent. Einn og hálfur dj þeytti svo skífum í lok kvölds.
Nemendur skemmtu sér vel og voru í alla staði til fyrirmyndar eins og við var að búast.

Ásta Laufey og Sóla voru með sitt sívinsæla Eurovision nasl námskeið

Stemmingsspjald (mood board) námskeið hjá Unni 

Námskeið í gotneskri skrift hjá Kristínu Þóru

Pop-up kortagerð með Kristínu Maríu og Kristínu Þóru

Skák með stórmeistaranum Braga Þorfinnssyni

Nökkvi Jarl kenndi nemendum undirstöðuatriði í japönsku

Þorbjörg og Karen sögðu frá óupplýstum sakamálum 

Nemendur tilbúnir í sleða- og jeppaferð

Dagana 7. og 8. febrúar 2024 voru skóhlífadagar í Borgarholtsskóla. Skóhlífadagar eru þemadagar skólans og eru þeir haldnir á vorönn. Skóhlífadagarnir draga nafn sitt af því að á fyrstu árum skólans voru allir nemendur í bláum skóhlífum og setti það sterkan svip á ganga skólans.
Á skóhlífadögum er hefðbundin kennsla lögð niður en í stað hennar er boðið upp á fjölbreytt námskeið. Hver nemandi velur sér þrjú námskeið en mörg spennandi námskeið voru í boði venju samkvæmt. 
Til að mynda var boðið upp á vélsleðaferð, skák, púsluspilakeppni, sushigerð, perlað fyrir Kraft, skreytingar í matsalnum fyrir Glæsiballið, japönsku, morðmisteríu, glee klúbb, skauta, spinning, matreiðslunámskeið með Eurovision þema, heimsókn til enska boltans hjá Sjónvarpi Símans og Magic the gathering. Auk þess var farið í heimsóknir á Þjóðminjasafnið og Listaháskóla Íslands.
Skóhlífadagar eru kærkomin tilbreyting frá hefðbundnu skólastarfi. Þeim lýkur svo með Glæsiballinu, árshátíð nemenda, að kvöldi fimmtudagsins 8. febrúar.

Nemendur á afrekssviði Borgarholtsskóla hafa gert það gott á íshokkívellinum undanfarið.
Þórir Hermannsson Aspar, Hektor Logi Hrólfsson og Viktor Jan Mojzyszek kepptu á dögunum með U20 landsliðinu í íshokkí þar sem þeir unnu brons í heimsmeistarakeppni IIHF í Serbíu. Svo var það Elísa Dís Sigfinnsdóttir sem keppti með U18 landsliði kvenna í íshokkí á HM í Búlgaríu fyrr í mánuðinum. Liðið lenti þar í öðru sæti í 2. styrkleikaflokki. 
Þessum nemendum er óskað innilega til hamingju með glæsilegan árangur á alþjóðavettvangi.

Mikael Aron Vilhelmsson, nemandi á afreksíþróttasviði Borgarholtsskóla, sló á dögunum Íslandsmet í keilu á Reykjavíkurleikunum.
Hann fékk samtals 1558 stig en niðurstaðan úr sex leikjum Mikaels var 289, 265, 213, 269, 265 og 257. Mikael sló jafnframt fjögur Íslandsmet í flokki sautján til átján ára en Mikael hélt upp á sautján ára afmælisdaginn sinn sama dag og keppnin fór fram.
Mikael Aroni er óskað innilega til hamingju með frábæran árangur og ljóst er að framtíðin er björt.

Mikael Aron. Myndin er af facebook síðu Reykjavíkurleikanna. 

Nýlega náði Borgarholtsskóli sínu öðru grænu skrefi af fimm. Verkefnið Græn skref í ríkisrekstri er fyrir stofnanir sem vilja draga úr neikvæðum umhverfisáhrifum af starfsemi sinni og efla umhverfisvitund starfsmanna. Með þátttöku í Grænum skrefum gefst stofnunum tækifæri til að innleiða öflugt umhverfisstarf með kerfisbundnum hætti undir handleiðslu sérfræðinga Umhverfisstofnunar.
Í desember 2023 fékk skólinn vottun á því að Grænu skrefi tvö væri náð. Flokkar grænna skrefa eru sjö en þeir eru miðlun og stjórnun, innkaup, samgöngur, rafmagn og húshitun, flokkun og minni sóun, viðburðir og fundir og eldhús og kaffistofur. Lögð er mismunandi áhersla á þessa þætti eftir því hvaða skrefi stofnunin er að vinna að.
Umhverfisnefnd skólans ásamt nemendum og starfsfólki er óskað til hamingju með græna skrefið.

Umhverfisnefnd skólans ásamt skólastjórnendum. 

Kennsla á vorönn 2024 hefst 5. janúar samkvæmt stundatöflu. Námsgagnalista má finna á <a href="http://www.inna.is/" target="_blank" rel="noopener">Innu</a>.
Töflubreytingar hefjast 4. janúar. Aðrir nemendur en útskriftarefni senda inn beiðnir um töflubreytingar rafrænt í gegnum <a href="http://www.inna.is/" target="_blank" rel="noopener">Innu</a> og verða þær afgreiddar svo fljótt sem auðið verður. <a href="https://wp.borgo.is/wp-content/uploads/Leidbeiningar-vegna-toflubreytinga-vor-2024.pdf">Leiðbeiningar um rafrænar töflubreytingar.</a>
Útskriftarefni (þeir nemendur sem eiga um 35 einingar eða minna eftir af sinni braut) eru hvött til að hafa samband við sinn sviðsstjóra, fóstru mætingar og umsjónar eða áfangastjóra til að tryggja að allir nauðsynlegir áfangar til útskriftar séu í töflu.
Fimmtudaginn 4. janúar fara fram tveir zoomfundir fyrir nýnema. Annars vegar fyrir nýnema í dagskóla á bíltæknibraut og málm- og véltæknibrautum og hins vegar nýnema í dreifnámi á félagsvirkni og uppeldssviði.
<a href="https://us02web.zoom.us/j/84899611120">Fundur eingöngu fyrir nýnema í dreifnámi á félagsvirkni og uppeldissviði klukkan 17:00 – 18:00.</a>
<a href="https://us02web.zoom.us/j/85612612150">Fundur eingöngu fyrir nýnema í dagskóla á bíltæknibraut  og málm- og véltæknibraut klukkan 18:30 – 19:00.</a>
Hægt er að fylgjast með lífinu í skólanum á <a href="https://www.instagram.com/borgo_skoli/" target="_blank" rel="noopener">instagramsíðum skólans</a> og <a href="https://www.instagram.com/nfbhs/" target="_blank" rel="noopener">nemendafélagsins</a> .
<a href="https://www.borgo.is/skolinn/spurningar-og-svor">Spurningar og svör varðandi skólann.</a>

Skólameistarar fylgja nemendum í salinn

Nökkvi Jarl Bjarnason kennari var kynnir

Ásta Laufey Aðalsteinsdóttir aðstoðarskólameistari flutti annál

Sönghópur Borgarholtsskóla söng undir stjórn Olgu Lilju Bjarnadóttur kennara

Katrín Eir Ásgeirsdóttir flutti kveðjuávarp útskriftarnema

Útskriftarnemendur af afreksíþróttasviði ásamt Arnóri Ásgeirssyni verkefnastjóra

Það voru líka nemendur af félagsvirkni- og uppeldissviði

Þórey Inga Örvarsdóttir Thorarensen hlaut hæstu einkunn á stúdentsprófi 

Ólafur Ágúst, Sólborg Birta, Ernir Óli og Ragnar Már

Ólafur Ágúst ásamt Geiri Guðsteinssyni fulltrúa Rótaryklúbbs Reykjavíkur - Grafarvogs

Karl Anders útskriftaðist úr vélvirkjun

Sindri Hrafn Jónsson útskrifaðist úr blikksmíði

Róbert Logi Stefánsson útskrifaðist af náttúrfræðibraut og afreksbraut

Þórey ásamt sviðsstjóra sínum, Marín Björk Jónasdóttur.

Ólafur Ágúst hlaut peningaverðlaun frá Rotarý klúbbi Reykjavíkur - Grafarvogs og Sólborg Birta hlaut fjölmargar viðurkenningar fyrir góðan námsárangur

Ásgeir Gunnarsson lætur af störfum vegna aldurs

Bernd Hammerschmidt lét af störfum sökum aldurs

Miðvikudaginn 20. desember 2023 fór fram brautskráning í Borgarholtsskóla.
Skólahljómsveit Mosfellsbæjar spilaði undir stjórn Daða Þórs Einarssonar í anddyri skólans á meðan gestir voru að koma sér fyrir í sætum.
Ársæll Guðmundsson skólameistari setti athöfnina og gaf orðið til Nökkva Jarls Bjarnasonar kennara sem var kynnir og stýrði athöfninni. Nemendur í kvikmyndagerð undir stjórn Þorgeirs Guðmundssonar kennara streymdu athöfninni á facebook síðu skólans.
Ásta Laufey Aðalsteinsdóttir aðstoðarskólameistari flutti annál annarinnar. 1192 nemendur stunduðu nám við skólann, 965 í dagskóla og 227 í dreifnámi. Hún fór yfir það helsta sem gerst hefur á önninni, bæði í hinu formlega skólastarfi og hjá Nemendafélagi skólans sem staðið hefur sig mjög vel.
Sönghópur Borgarholtsskóla flutti tvö tónlistaratriði undir stjórn Olgu Lilju Bjarnadóttur kennara. Fyrra lagið sem þau fluttu var Fallegur dagur en lagið og textinn er eftir Bubba Morthens. Hið síðara var hinn þekkti jólasálmur Heims um ból eftir Franz Gruber við texta Sveinbjörns Egilssonar.
Ársæll og Ásta Laufey sáu um brautskráningu nemenda ásamt sviðsstjórum en 74 nemendur voru brautskráðir af mismunandi námsbrautum skólans og sumir útskrifuðst af fleiri en einni braut. Venja er að allir útskriftarnemar fái hýasintu við brautskráningu um jól en að þessu sinni fengu útskriftarnemar rósir vegna uppskerubrests á hýasintum. Fjölmörg verðlaun og viðurkenningar voru veitt fyrir góðan námsárangur. Þórey Inga Örvarsdóttir Thorarensen hlaut hæstu einkunn á stúdentsprófi en hún útskrifaðist með viðbótarnám til stúdentsprófs eftir nám á leikskólaliðabraut.
Katrín Eir Ásgeirsdóttir flutti kveðjuávarp útskriftarnema en hún fékk einnig viðurkenningu fyrir störf í þágu nemendafélags skólans, NFBHS.
Ársæll flutti ræðu til útskriftarnema. Í ræðu sinni ræddi hann hugtakið árangur og hvað felst í því. Hann sagði að árangur ætti sér uppsprettu í ýmsu en árangur væri áfangi sem er náð. Norm og samfélagið hafa mikið um að segja hvað telst æskilegur árangur. Uppspretta árangurs er innra með hverjum og einum og það er hlutverk skólans að breyta viðhorfum en ekki að steypa alla í sama mótið enda er það ekki hægt þar sem manneskjur eru margar og mismunandi. Ársæll sagði nemendum að það væri mikilvægt að eiga sér hugsjónir og takmark en það mætti aldrei verða á kostnað annarra. Hann hvatti nemendur til að sýna hugrekki, kjark og þor og minnti á að bestu launin væru vellíðan sem fylgdi vel unnu dagsverki.  Hann minnti á lífsfyllingin eða sigrarnir í lífinu fáist ekki  með því að sneiða hjá öllum erfiðleikum og án áfalla, heldur fælust sigrar lífsins í því að standa upp aftur. Að lokum óskaði Ársæll útskriftarnemendum góðra  friðartíma þar sem þau sjálf yrðu merkisberar friðar, auk þess að óska þeim velfarnaðar í leik og starfi þar sem árangur af störfum þeirra yrði metinn á forsendum manngæsku og kærleika frekar en krónum og lækum á samfélagsmiðlum.
Bernd Hammerschmidt þýskukennari og Ásgeir Gunnarsson kennari í bíliðngreinum láta nú af störfum sökum aldurs og voru þeir báðir kvaddir og þeim þakkað fyrir vel unnin störf.
Velunnurum skólans var þakkað fyrir þeirra framlag til skólastarfsins. Starfsfókinu, sem er um 150 manneskjur, var þakkað fyrir samstarfið á skólaárinu og fyrir að mennta nemendur Borgarholtsskóla af metnaði, hugsjón og fagmennsku. Einnig var öllum þeim, sem með einum eða öðrum hætti, komu að framkvæmd og skipulagningu brautskráningarinnar færðar sérstakar þakkir.
Fleiri myndir frá athöfninni eru á <a class="secure external" title="facebook síðu skólans (Opnast í nýjum vafraglugga)" href="https://www.facebook.com/Borgarholtsskoli/" target="_blank" rel="noopener">facebook síðu skólans</a> .

Elísa Dís Sigfinnsdóttir tekur við styrknum 

Föstudaginn 15. desember var afhentur landsliðsstyrkur Borgarholtsskóla. Sjö nemendur hlutu styrk að þessu sinni fyrir landsliðsverkefni á haustönn 2023.
Styrkhafar eru: 
Auður Bergrún Snorradóttir hlaut styrk fyrir þátttöku sína í landsliðsverkefnum í golfi en hún fór á European Young Master 16 ára og yngri í Slóvakíu . 
Mikael Máni Ísaksson Guðmann hlaut styrk fyrir þátttöku í landsliðsverkefnum í júdó en hann fór á HM unglinga. 
Elísa Dís Sigfinnsdóttir hlaut styrk fyrir þátttöku sinni með U18 landsliðinu í íshokkí á 4 nations móti. 
Stefán Magni Hjartarsson hlaut styrk fyrir þátttöku sína með U17 landsliðinu á EM í handbolta í Gautaborg 
Stefanía Tera Hansen hlaut styrk fyrir þátttöku sína á Evrópumóti og Norðurlandamóti í körfubolta. 
Bergdís Anna Magnúsdóttir hlaut styrk fyrir þátttöku sína á Evrópumóti og Norðurlandamóti í körfubolta. 
Stefán Fannar Hallgrímsson hlaut styrk fyrir þátttöku sína í undankeppni ADCC Trials í Jiu-jitsu.
Meðfylgjandi mynd var tekin þegar styrkurinn var afhentur en þar eru styrkþegar ásamt Arnóri Ásgeirssyni, verkefnastjóra afreksíþróttasviðs. Á myndina vantar Elísu Dís og Mikael Mána.
Styrkhöfum er óskað innilega til hamingju með styrkinn.

Styrkþegar ásamt Arnóri Ásgeirssyni, verkefnastjóra afreksíþróttasviðs. 

Bíltæknibrautum Borgarholtsskóla barst á dögunum vegleg gjöf frá <a href="https://bilrudur.is/">Orka ehf.</a> 
Fyrirtækið færði skólanum Sata sprautukönnur fyrir lakk og grunnefni. Einnig fékk skólinn aukahluti fyrir sprautukönnurnar en í heildina var gjöfin að andvirði um 700.000 kr. Orka ehf. selur Sata vörur sem eru leiðandi á markaði fyrir helstu verkfæri og tól til bílamálunar.
Gjöfin mun nýtast vel við kennslu í bílamálun og er Orku ehf. þakkað kærlega fyrir.

Andri Guðmundsson, sölumaður Orku ehf. og Sæmundur Hreinn, innkaupastjóri fyrirtækisins afhentu Sigurjóni Arnarsyni kennara Borgarholtsskóla gjöfina.

Nemendur í fötlunarfræði (FTL1A05) fóru í haust í heimsókn í Smiðjuna í Grafarvogi. Smiðjan er vinna og virkni fyrir fatlað fólk en þar er lögð áhersla á að öll fái að njóta sín í hvetjandi umhverfi. Smiðjan er einnig samfélag þar sem tómstundaiðkun er í fyrirrúmi. Þar er til að mynda að finna skynörvunarherbergi sem er listasmiðja með fjölbreyttan efnivið og farið er í vettvangsferðir og sund.
Nemendur fengu kynningu frá verkefnastjóra Smiðjunnar, Skúlínu Kristjánsdóttur, þar sem hún fræddi þau um starfsemi Smiðjunnar. Hún sýndi þeim svo vinnustaðinn og hittu nemendur bæði leiðbeinendur Smiðjunnar sem og fatlað starfsfólk hennar. Þetta var áhugaverð og skemmtileg heimsókn og Smiðjan að mati nemenda frábært úrræði fyrir fatlaða einstaklinga.
Smiðjunni er þakkað kærlega fyrir góðar móttökur og kynningu.

Miðvikudaginn 6. desember tóku fimm nemendur skólans við viðurkenningu fyrir bestu smásögurnar í undankeppni Borgarholtsskóla fyrir smásagnakeppni FEKÍ, Félags enskukennara á Íslandi.
Enskukennarar Borgarholtsskóla voru í dómnefndinni og að þeirra mati skiluðu eftirfarandi nemendur inn bestu sögunum: Elísabet Heiða Harðardóttir (3. ár á viðskiptabraut), Daniela Galaszewska (2. ár í grafískri hönnun), Birna Margrét Guðjónsdóttir (3. ár í grafískri hönnun), Hugrún Vigdís Viktor Hákonar (3. ár í grafískri hönnun) og Íris Þöll Hróbjartsdóttir (3. ár í kvikmyndagerð). Vert er að rifja upp að Íris Þöll Hróbjartsdóttir vann keppnina á landsvísu árið 2022 og skaut þar með öðrum keppendum úr framhaldsskólum landsins ref fyrir rass.
Það verður spennandi að sjá hvernig Borgarholtsskóla gengur í keppninni í ár en nemendur úr Borgó hafa nánast alltaf verið í einhverjum af þremur efstu sætunum í landskeppninni og farið af því tilefni á Bessastaði til þess að taka við verðlaunum úr hendi Elizu Reid forsetafrúar.
Þessum flottu og hæfileikaríku nemendum er óskað innilega til hamingju með frábæran árangur og þeim óskað góðs gengis í lokakeppninni.

Verðlaunahafar ásamt enskukennurum (á myndina vantar Birnu Margréti)

Bíltæknibrautir Borgarholtsskóla fengu á dögunum veglega gjöf frá <a href="https://automatic.is/" target="_blank" rel="noopener">Automatic</a>. Það voru boddíhlutir fyrir bíla, stuðarar, húdd og bretti sem koma að góðum notum við kennslu, bæði í bílamálun og bifreiðasmíði.
Automatic er þakkað kærlega fyrir höfðinglega gjöf.

Elvar og Birgir kennarar í bílamálum taka við gjöfinni. 

Vinningshafar ásamt Forseta Íslands, landlækni og kennurum sínum.

Fjórir nemendur Borgarholtsskóla unnu á dögunum til verðlauna í samkeppni Forvarnardagsins. Þetta er annað árið í röð sem Borgarholtsskóli er hlutskarpastur á framhaldsskólastigi en nemendur úr Hrafnagilsskóla fengu verðlaun á grunnskólastigi.
Þema keppninnar eru verndandi þættir og lögðu nemendur áherslu á samveru með fjölskyldu í verkefni sínu. Það voru þau Daníel Orri Gunnarsson, Eybjörg Rós Tryggvadóttir, Snorri Steinn Svanhildarson og Sindri Þór Guðmundsson sem unnu verðlaunin en verkefni þeirra var unnið undir stjórn Flosa Jóns Ófeigssonar og Guðbjargar Hilmarsdóttur, kennara á listnámsbraut. Verðlaunin voru afhent á Bessastöðum sunnudaginn 2. desember. Guðni Th. Jóhannesson, forseti Íslands og Alma Möller landlæknir fluttu ávörp við afhendingu verðlaunanna og viðstödd voru nemendur skólanna ásamt foreldrum og forráðafólki.
Embætti landlæknis stendur fyrir Forvarnardeginum í samstarfi við embætti forseta Íslands, ÍSÍ, UMFÍ, Heimili og skóla, Rannsókn og greiningu, Reykjavíkurborg, SAFF, Samband sveitarfélaga, Samfés og Skátana. Forvarnardagurinn er haldinn ár hvert og er sjónum sérstaklega beint að ungmennum í 9. bekk og á fyrsta ári í framhaldsskóla.
Nemendum og kennurum er óskað innilega til hamingju með þennan frábæra árangur.

Nemendur Borgó ásamt Forseta Íslands og landlækni 

Vésteinn Hafsteinsson, afreksstjóri ÍSÍ

Nemendur á afreksíþróttasviði ásamt verkefnastjóra afrekssviðs, Arnóri Ásgeirssyni, fóru á ráðstefnuna Vinnum gullið mánudaginn 20. nóvember. Vinnum gullið &#8211; ný stefna í afreksíþróttum á Íslandi var á vegum Mennta- og barnamálaráðuneytisins, í samstarfi við ÍSÍ, UMFÍ og Samband íslenskra sveitarfélaga. Ráðstefnan fór fram í Silfurbergi í Hörpu en á henni voru kynnt áform um stóreflingu afreksíþróttastarfs hérlendis með bættri aðstöðu, stuðningi og réttindum fyrir afreksíþróttafólk. Fjallað var um hvernig skapa megi umgjörð fyrir unga íþróttaiðkendur til að vaxa og dafna, jafnt í þéttbýli sem dreifbýli. Þá kom þjóðþekkt afreksíþróttafólk sínum áherslum á framfæri og var aðkoma sveitarfélaga og atvinnulífsins rædd.
Það var áhugavert fyrir nemendurna að hlusta á og sjá einhverjar helstu fyrirmyndir í íslenskum afreksíþróttum miðla reynslu sinni . Það eru spennandi tímar framundan fyrir afreksíþróttir á framhaldsskólastigi og athyglisvert að heyra framsögur sérfræðinga á þessu sviði frá Noregi og Lúxemborg.

Nemendur afreksíþróttasviðs á ráðstefnu

Þessar seldu skartgripi sem þær bjuggu til

Þessar stúlkur prentuðu eigin hönnun á peysur og seldu 

Bakkelsið rann út eins og heitar lummur

Þegar safnast höfðu 30 þúsund krónur fengu nemendur að teikna á Nökkva, kennara 

Hægt var að fá teiknaða portrett mynd af sér

Nemendur í skapandi hugmyndavinnu (SKH3A05) héldu Pop-up markað í matsal skólans á þriðjudaginn. Pop-up markaðurinn er hluti af áfanganum en markmið áfangans er að efla sköpunarkraft, frumkvæði, nýsköpun og virkja áræðni nemenda til að finna nýjar lausnir og/eða skapa gæði sem máli skipta. Í áfanganum er unnið út frá heimsmarkmiðum Sameinuðu þjóðanna.
Nemendur voru með fjölbreyttar vörur og þjónustu á boðstólnum, seldu til dæmis notaðan fatnað, bjuggu til skargripi, seldu bakkelsi og teiknuðu portrett myndir af fólki sem þess óskaði. Allur ágóði markaðarins rennur til Unicef hjálparstarfs í Palestínu. Til að gera þetta meira spennandi voru nemendur búnir að fá starfsfólk með sér í lið. Starfsfólk fékk þá yfir sig vatnsfötu, rjóma í andlitið eða það var krotað á það, allt eftir því hvað safnaðist mikið.

Nemendur í handavinnu málmiðna (HVM3A05) eru af ýmsum brautum málm- og véltæknisviðs skólans. Eitt af verkefnum þeirra í áfanganum er að smíða sandkassagröfu sem margir eiga æskuminningar af úr sandkössum leikskólanna.
Grafan er smíðuð úr ryðfríu stáli og undirstaðan er úr svörtu járni. Í þessu verkefni fengu nemendur tækifæri til að þjálfa ýmiss konar hæfni, svo sem í uppmerkingu, sögun, borun, rennismíði, skurði með slípirokk og TIG-suðu svo eitthvað sé nefnt. Þetta var fyrsti hópurinn sem spreytir sig á þessu verkefni en nemendur voru mjög sáttir við þá fjölbreyttu þjálfun sem af verkefninu hlaust.

Smokey Quartz the First, Bartosz og Chardonnay Bublée 

Fimmtudaginn 16. nóvember fór fram dragkeppni Borgarholtsskóla sem skipulögð var af hinsegin nefnd skólans. Dragkeppnin fór fram í leiklistarstofu skólans og gekk frábærlega. Keppendur stóðu sig vel en Chardonnay Bublée og Smokey Quartz the First voru í dómnefnd.
Í 1.sæti lenti Heiða í gervi Álfheiðar Bjarkar og í 2.sæti varð Sigríður í gervi Tiffany Sparks the First.
Flosi Jón, kennari á listnámsbraut, tók lagið Whole again í útgáfu Daða Freys við mikinn fögnuð viðstaddra.

Kristín Svava Tómasdóttir les upp úr verkum sínum 

Dagur íslenskrar tungu er haldinn hátíðlegur um allt land þann 16. nóvember. Í Borgarholtsskóla er löng hefði fyrir því að efna til hátíðarhalda í tilefni dagsins og að þessu sinni var haldið upp á daginn með dagskrá í Borgarbókasafninu í Spöng.
Dagskráin var fjölbreytt að vanda. Kór nemenda Borgarholtsskóla söng íslensk lög undir stjórn Olgu Lilju Bjarnadóttur og Kristín Svava Tómasdóttir, sagnfræðingur og rithöfundur, las upp úr tveimur verka sinna, Farsótt og Hetjusögum. Þessi verk eru bæði unnin upp úr sagnfræðilegum heimildum, annars vegar um farsóttarhús og hins vegar úr sögum um ljósmæður.
Íslenskukennarar skólans sáu um skipulag hátíðarinnar og eiga þau hrós skilið. Borgarbókasafninu er þakkað kærlega fyrir hlýlegar móttökur og gott samstarf, kórnum fyrir ljúfan söng og Kristínu Svövu fyrir komuna og upplesturinn.

Kórinn syngur undir stjórn Olgu Lilju Bjarnadóttur

Kiwanisklúbburinn Höfði hefur styrkt sérnámsbraut skólans frá árinu 2007. Klúbburinn bauð Hrönn Harðardóttir, sviðsstjóra sérnáms- og undirbúningssviðs og Soffíu Sigurlaugu Grímsdóttur, kennara á sérsnámsbraut til kvöldverðar 2. nóvember síðastliðinn. Tilefnið var að afhenda styrk frá klúbbnum fyrir sérnámsbraut skólans. Sjóðurinn sem klúbburinn hefur safnað stendur nú í 500.000 og hyggst klúbburinn halda áfram að bæta í.
Kiwanisklúbbnum Höfða er þakkað kærlega fyrir rausnarlega gjöf og gott samstarf í gegnum árin.

Á föstudag fékk skólinn frábæra heimsókn frá umsjónarmönnum þáttarins Landans á RÚV. Gísli Einarsson, sjónvarpsmaður, kom ásamt upptökuteymi að hitta nemendur af sérnámsbraut í málmsmíðaáfanga sem Markús og Ingvi kenna. Hann var mjög áhugasamur um starfið sem og nemendur og kennara. Það verður svo spennandi að sjá útkomuna af þessari heimsókn sem sýnd verður í Landanum á næstu vikum.
&nbsp;

Málm- og véltæknideild hefur fengið margar heimsóknir á síðustu dögum. Á föstudaginn fengu nemendur í lífsleikni í verknámi góða heimsókn frá félagi blikksmiða. Fengu nemendur kynningu á starfi blikksmiða og þeim fjölbreyttu og áhugaverðu verkefnum sem þeir fást við.
Á föstudag komu einnig fulltrúar frá FIT (Félagi iðn- og tæknigreina) ásamt ljósmyndara og blaðamanni. Þeir komu til að taka myndir og viðtöl fyrir tímarit félagsins sem verður gefið út um mánaðamótin. Heimsóttu þeir bílaiðngreinar, málm- og véltæknigreinar og pípulagnir.
Á fimmtudag komu fulltrúar frá fyrirtækjum í málm- og véltæknigreinum en þeir höfðu þegið boð skólans um að kynna sér aðstöðu, nám og kennslu í greinunum. Þeim var boðið að fara í tíma og tala við nemendur og kennara. Í heildina mættu tæplega 20 aðilar frá nokkrum fyrirtækjum, m.a. VHE, Rio Tinto á Íslandi, Brim, Marel, Héðni, Fratak og HD tækni. Að loknu áhorfi og spjalli við nemendur og kennara í kennslustundum var boðið upp á pítsu og spjall á kaffistofunni, þar sem farið var yfir rafræna ferilbók og ferli samninga samkvæmt nýju fyrirkomulagi. Einnig var rætt um hvernig hægt væri að vinna saman að því að efla og styrkja nám í málm- og véltæknigreinum og hvernig við sjáum fyrir okkur enn frekara samstarf á komandi árum. Þetta var frábær heimsókn og allir sammála um að þetta væri eitthvað sem ætti að vera fastur liður á hverri önn.

Nemendur vinna í hópum ásamt kennurum sínum

Horft yfir matsal skólans á Lýðræðisfundi

Lýðræðisfundur nemenda fór fram föstudaginn 3. nóvember. Á lýðræðisfundum gefst nemendum tækifæri til að viðra skoðanir sínar og rökræða þær við samnemendur. 
Fundurinn fór fram í matsalnum en nemendur skiptust á borð og á hverju borði var kennari sem var hópstjóri en umræðan sjálf var alfarið í höndum nemenda.
Umræðuefnin voru þrjú:
<ul>
<li>Námið (uppsetning náms, námsmat o.fl.)</li>
<li>Skólinn (húsgögn, aðstaða o.fl.)</li>
<li>Félaglíf (skólabragur, viðburðir o.fl.)</li>
</ul>
Eftir umræðurnar voru helstu niðurstöður hvers hóps kynntar. Meðal þeirra atriða sem nemendur töldu upp varðandi skólann var að nemendur vildu fá frítt kaffi, fleiri kósý staði í skólanum og fjölbreyttari og hollari mat í mötuneytið. Varðandi námið vildu nemendur til að mynda fá fleiri uppbrotstíma, þægilegri stóla og lengri pásur á milli tíma. Þegar kom að félagslífinu vildu nemendur helst fjölbreyttari klúbba, fleiri kósýkvöld, fleiri afslætti tengda nemendafélaginu og fá að gera eigin tillögur að skólapeysum.
Fundurinn tókst mjög vel en Karen Ösp Birgisdóttir stjórnaði honum af stakri prýði. Niðurstöðurnar verða kynntar stjórnendum og starfsfólki skólans sem munu vinna með þær áfram.

Ágúst, nemandi á framhaldsskólabraut, með slaufur. 

Nemendur á framhaldsskólabraut gerðu skemmtilegt verkefni í MAG suðu nýverið. Nemendurnir, undir handleiðslu Harðar Harðarssonar kennara, smíðuðu bleikar slaufur úr málmi. Slaufurnar gáfu þeir svo stjórnendum og prýða þær skrifstofur fólks í tilefni bleiks októbers.

Mikil vinna fór í gerð auglýsingarinnar

Á dögunum var tekin upp auglýsing í bílaskála skólans. Á ferðinni var tökulið frá kvikmyndafyrirtækinu Republik og var verið að taka upp auglýsingu fyrir Vinnueftirlitið. Nemendur í leiklist við Borgarholtsskóla fengu gullið tækifæri til að vinna sem aukaleikarar í auglýsingunni og fá reynslu í að leika fyrir framan myndavélar. Tökur gengu vel og er tökuliðið ánægt með afraksturinn.
&nbsp;

Nemendur í áfanganum FJÁ3A05 (Fjármálastjórn) fóru í síðustu viku ásamt kennara sínum, Reyni Má Ásgeirssyni, í kynnisferð í Seðlabanka Íslands. Þar var vel tekið á móti þeim af Stefáni Jóhanni Stefánssyni sem er útgáfustjóri Seðlabankans og Stefáni Rafni Sigurbjörnssyni sem er upplýsingafulltrúi bankans. Stefán Rafn kynnti starfsemi og hlutverk Seðlabankans fyrir nemendum auk þess að sýna þeim þá eiginleika sem eiga að prýða góða og ófalsaða peningaseðla. Nemendum var sýndur 10 þúsund króna seðill og fengu þeir útfjólublátt ljós til að skoða svokallað draugamerki seðilsins. Nemendur fengu svo að spyrja út í starfsemi bankans, fjármál og efnahagslífið.
Heimsóknin var mjög vel heppnuð og nemendur ánægðir með daginn. Seðlabanka Íslands er þakkað kærlega fyrir hlýlegar og góðar móttökur.

Nemendur ásamt Stefáni Rafni og Stefáni Jóhanni. 

Á dögunum tókust nemendur í bifvélavirkjun á við skemmtilegt verkefni í áfanganum HRE3A05 &#8211; vélarskoðun og viðgerðir brunahreyfla. Einn nemendanna kom með Corvette bíl, árgerð 1982, sem fór ekki í gang. Corvette bíllinn er gæðagripur sem hefur verið haldið vel við en allir partar eru upprunalegir. Eftir langa bilanagreiningu kom í ljós að hitaskynjarinn var bilaður í vélinni.
Það er alltaf gaman þegar verkefni eru fjölbreytt og skemmtileg sem þessi.
&nbsp;

Dagana 2. &#8211; 6. október er heilsuvika í Borgarholtsskóla.
Hún byrjaði á mánudagsmorgni með því að boðið var upp á ávexti og lýsi í anddyrum skólans. Í hádeginu á mánudag var kynning á frisbígolfi fyrir aftan skólann þar sem Blær Örn Ásgeirsson, margfaldur Íslandsmeistari í greininni mætti. Nemendur gátu reynt fyrir sér með að kasta disk í körfuna og vinna diska frá <a href="https://www.frisbigolfbudin.is/">Frisbígolfbúðinni</a>.
Miðvikudaginn 4. október var aftur boðið upp á ávexti og lýsi um morguninn en í hádeginu var keppt í sippi og hlaupi upp stigana í skólanum.
Fimmtudaginn 5. október fór svo fram aðalviðburður heilsuvikunnar en það var hreyfitíminn. Þá féllu niður tveir tímar en í staðinn gátu nemendur valið sér hreyfingu eða íþrótt. Fjölbreytni einkenndi það sem í boði var, svo sem zumba, fótbolta, fjöruferð, skauta, keilu og skák. Í hádeginu var svo Ari Eldjárn með uppistand í matsal skólans og vakti hann mikla lukku.
Á meðan á hreyfiviku stóð var í gangi instagram leikur þar sem hægt var að vinna veglega vinninga með því að setja mynd af viðkomandi á hreyfingu inn á instagram og tagga Borgarholtsskóla og nemendafélagið.
Heilsuvikan veitir kærkomna tilbreytingu í skólalífið um leið og vakin er athygli á heilbrigðum lífsstíl.

Forseti Íslands, Guðni Th. Jóhannesson, Ásta, Ársæll, Flosi og Guðbjörg

Flosi, Guðbjörg, Dagur B., Guðni Th., Ásta, Alma, Margrét Lilja, Inga Berg, Arnar og Óðinn

Í tilefni Forvarnardagsins 4. október stóð Embætti landlæknis fyrir málþingi og fékk Borgarholtsskóli þann heiður að hýsa þingið.
Margir góðir gestir komu á viðburðinn en þau sem fluttu ávörp voru forseti Íslands, hr. Guðni Th. Jóhannesson, Alma Möller landlæknir, Dagur B. Eggertsson borgarstjóri Reykjavíkur og Margrét Lilja Guðmundsdóttir en Dóra Guðrún Guðmundsdóttir var kynnir.
Ársæll Guðmundsson skólameistari og Ásta Laufey Aðalsteinsdóttir aðstoðarskólameistari fluttu ávörp fyrir hönd Borgarholtsskóla auk þess Flosi Jón Ófeigsson og Guðbjörg Hilmarsdóttir kennarar á listnámsbraut kynntu forvarnarverkefni sem unnið var undir þeirra stjórn í fyrra og fékk <a href="https://www.borgo.is/frettir/verdlaun-i-tilefni-forvarnardagsins">fyrstu verðlaun í verðlaunakeppni forvarnardagsins</a>. Arnar Már Atlason og Óðinn Már Gunnarsson sögðu frá gerð verðlaunaverkefnisins fyrir hönd síns hóps.
Nýnemar Borgarholtsskóla og nemendur úr 9. bekk Klébergsskóla voru viðstödd málþingið.
Öll sem fluttu ávörp voru sammála um hversu góðum árangri Ísland hefur náð í forvarnarstarfi undanfarin ár. Þau töldu að ungmenni í dag væru besta kynslóðin hingað til þegar kemur að því að sleppa neyslu áfengis og vímuefna og framtíðin væri því björt.
Mikil ánægja var með þingið sem streymt var á <a href="http://www.forvarnardagur.is">vef Forvarnardagsins</a> og er hægt að nálgast upptökuna þar.

Forseti Íslands, skólastjórnendur og nemendur Borgarholtsskóla 

Ársæll skólameistari þakkar veglega gjöf

Pípulagningadeild skólans heldur áfram að fá gjafir. Í þetta sinn fékk deildin að gjöf tæki frá Ísleifi. Um er að ræða innbyggða salerniskassa frá TECE og skálar frá Duravit. Einnig fékk deildin handlaugar ásamt blöndunartækjum og blöndunartæki fyrir sturtu ásamt sturtustöngum.
Haukur Bjarnason og Aldís Arna Einarsdóttir afhentu gjafirnar en Ársæll Guðmundsson skólameistari og Skarphéðinn Skarphéðinsson deildarstjóri veittu þeim viðtöku fyrir hönd skólans. Ísleifi eru færðar bestu þakkir fyrir veglegar gjafir.
Að lokum þáðu gestir snittur og kaffisopa í Skarpaskjóli, nýju aðstöðu pípulagningadeildarinnar.

Sex nemendur ásamt tveimur kennurum Borgarholtsskóla vörðu síðustu viku í Erasmus+ verkefni í bænum Idrija í Slóveníu. Verkefnið sem nemendur tóku þátt í snýst um líffræðilegan fjölbreytileika og jarðfræði en er einnig kjörið tækifæri til að kynnast menningu annara landa. Nemendur gistu hjá slóvenskum ungmennum sem þau höfðu kynnst þegar slóvenski hópurinn heimsótti Ísland í vor.
Hópurinn hefur meðal annars skoðað dropasteinshelli, séð sýningar um líffræðilegan fjölbreytileika og jarðfræði svæðisins. Þau mættu einnig í kennslustundir í skólanum, fóru í skógarferð með skógarhöggsmanni, fóru ofan í kvikasilfursnámu og fræddust um blúndugerð. Kvikasilfursnámuvinna og blúndugerð hafa verið aðalatvinnugreinar fólks í Idrija frá upphafi bæjarins og langt fram á 20. öld. Í lok ferðarinnar heimsóttu þau svo Bled vatnið.
Á heimleiðinni verður millilent í Feneyjum þar sem þau hafa tíma til að skoða sig um áður en flogið verður heim.

Nemendur hlusta með athygli á orð Ársæls skólameistara

Enn ein gjöfin hefur borist pípulagnadeild skólans. Vatnsvirkinn ehf. hefur fært deildinni að gjöf ofna, lokahús, hitastilla, stillité og ýmsan tæknibúnað fyrir gólfhitakerfi. Mun gjöfin nýtast nemendum afar vel í ýmsum áföngum. Jafnframt hefur fyrirtækið boðist til að gefa skólanum ýmsan búnað sem notaður er við lagningu neysluvatnskerfa.
Það voru þeir Guðni Valberg Baldursson, framkvæmdastjóri og Guðlaugur Garðar Lárusson, sölumaður sem afhentu gjöfina, en Ársæll Guðmundsson, skólameistari og Skarphéðinn Skarphéðinsson, deildarstjóri veittu henni viðtöku fyrir hönd skólans. Í þakkarræðu sinni nefndi Ársæll að sú samvinna sem komist hefði á milli skólans og atvinnulífsins á sviði pípulagna væri afar mikilvæg fyrir greinina og óskaði þess að slík samvinna næðist á fleiri sviðum.
Að afhendingunni lokinni var efnt til snittuveislu þar sem viðstaddir nutu veitinga og spjalls á léttum nótum.

Ársæll og Guðni Valberg handsala samninginn

Nemendurnir ásamt Erni, Stínu Maju og Stínu Þóru

Listafólkið ásamt sviðstjóra og skólameisturum

Nemendur á þriðja og síðasta ári á listnámsbraut, grafískri hönnun, hafa nýlokið við að mála vegglistaverk í Glerbúrið, en það er aðstaða inn af matsal nemenda þar sem þau geta hvílt sig eða leikið sér á milli kennslustunda. Eftir að hafa velt verkefninu fyrir sér og rætt hugmyndir fram og til baka tóku nemendurnir þá ákvörðun að hafa fiskabúrs-þema og máluðu þau ýmsar verur sem hugsanlegt væri að finna í fiskabúri á veggina. Eins og meðfylgjandi myndir sýna er útkoman skemmtileg og ansi lífleg.
Verkið mun standa uppi í þrjú ár en hugmyndin er sú að þriðja árs nemar í grafíkinni fái alltaf tækifæri til að búa til vegglistaverk í skólanum sínum og hafa þrír veggir/rými verið tekin frá. Allir þekkja verkið sem er á vegg gasgeymslu skólans – Blómstrað í Borgó – en að auki hafa glerbúrið og gangur milli bíla- og málmskála verið tekin frá fyrir listafólkið.
Örn Tönsberg, vegglistamaður, veitti nemendum tilsögn ásamt kennurum þeirra í grafíkinni, þeim Raggý, Stínu Maju og Stínu Þóru. Í tilefni verklokanna var listafólkinu boðið til pítsuveislu.

Nemendur ásamt skólastjórnendum og kennurum 

Síðasta vika var nýnemavika í Borgarholtsskóla en hún hófst með því að nemendafélagið seldi snúða og mjólk í hádeginu á mánudag. Á mánudagskvöld var nýnemakvöld þar sem gefnar voru pizzur, farið var í hópleiki og nemendafélagið kynnti nefndir og ráð. Á þriðjudag var íþróttadagur en keppt var í borðtennis, foosball og körfubolta. 
Á miðvikudag voru grillaðar pylsur í hádeginu og reistur hoppukastali á skólalóðinni fyrir nemendur. Á miðvikudagkvöld var svo nýnemaball í Gamla bíó um kvöldið og var það í samvinnu við Fjölbrautaskólann í Breiðholti og Fjölbrautaskólann við Ármúla. Það fór allt vel fram og nemendur skemmtu sér konunglega. Nýnemavikan endaði svo á náttafatadegi á föstudegi.
Í vikunni fara fram nýnemaviðtöl þar sem nýnemar verða teknir inn í nefndir nemendafélagsins.
&nbsp;
&nbsp;

Elma Björns­dótt­ir, Sylvía Kar­en Ragn­ars­dótt­ir, Sól­rún Eva Hilm­ars­dótt­ir og Stefán Árni Stef­áns­son, nem­end­ur í bíla­mál­un

Jagúarinn bíður þess að verða málaður

Í Borgarholtsskóla hefur undanfarin misseri verið unnið að viðgerðum á Jagúar-bifreið Nóbelskáldsins okkar, Halldórs Kiljan Laxness. Verkið er unnið af nemendum skólans í bílamálun og bifreiðasmíði undir handleiðslu kennara. Nú er farið að hilla undir verklok og er áætlað að bíllinn verði afhentur safninu að Gljúfrasteini nú í vor.
Á dögunum var efnt til verkfundar við borðstofuborð skáldsins á Gljúfrasteini þar sem saman komu fulltrúar Borgarholtsskóla og safnsins auk starfsmanna Poulsen og B&amp;L, en þessi fyrirtæki hafa bæði komið að verkinu með myndarlegum hætti. Poulsen skaffar allt efni sem þarf til að mála bílinn og B&amp;L hafa gefið ýmsa varahluti sem á hefur þurft að halda og pantað þá beint frá Jagúar-verksmiðjunum á Bretlandi.
Eins og sjá má á meðfylgjandi myndum er enn nokkuð langt í land að Jagúarinn verði tilbúinn en áætlað er að ytra byrði verði málað á næstu tveimur vikum. Þá fara vél og gírkassi í yfirhalningu og á meðan verður vélarhúsið málað. Að því loknu verður bíllinn settur saman og afhentur safninu.

Jagúarhópurinn fundar á Gljúfrasteini 15. september 2023

Ráðherra breytir tvemur D-um í B - fyrir Borgó

Ásmundur Einar ræðir við Skarphéðinn deildarstjóra pípulagna, Ársæl skólameistara og Ástu Laufey aðstoðarskólameistara

Ásmundur Einar og Ársæll ásamt Þórunni Sveinbjörnsdóttur og Fanný Gunnarsdóttur sem sæti eiga í skólanefnd Borgó

„Þetta er fyrsta skrefið. Ég segi skref því inn í þessum áformum er að stækka Borgarholtsskóla. Við ætlum að hanna og greina það á næsta ári hvernig sú viðbygging á að vera og nota árið 2025 til að framkvæma,“ sagði Ásmundur Einar Daðason, mennta- og barnamálaráðherra, meðal annars í ræðu sinni þegar hann vígði nýja pípulagningadeild Borgarholtsskóla við Bæjarflöt í Grafarvogi.
Skólinn kallar deildina Skarpaskjól en Skarphéðinn Skarphéðinsson, deildarstjóri í pípulögnum, hefur haft veg og vanda af því að gera aðstöðuna klára á aðeins nokkrum mánuðum. Ásmundur benti á að deildin minnti lítið á hina hefðbundnu kennslustofu. Þetta væri sérhæft húsnæði fyrir kennsluna sem þarna færi fram, eitthvað sem honum hugnaðist vel.
„Það er ánægjulegt að sjá þetta fara af stað. Ég hef mikinn áhuga á eflingu starfsnáms og við ætlum að mæta þeirri eftirspurn sem er með aðgerðum,“ sagði hann og bætti við. „Hér er sérhæfð aðstaða. Þetta er ekki einföld kennslustofa eins og við þekkjum hana. En við verðum að geta mætt því fjárhagslega &#8211; ekki bara að byggja heldur líka eiga fjármagn til að mennta nemendur og skólinn fái það fjármagn sem þarf til þess,“ sagði ráðherra.
Ársæll Guðmundsson, skólameistari Borgarholtsskóla, tók einnig til máls og sagði að þau 30 ár sem hann hefði starfað innan skólakerfisins hefði hann barist lengi fyrir því að hugað sé að kennsluhúsnæðinu því allt of oft hefðu Íslendingar sett list-, verk- og starfsnám í húsnæði sem hannað væri til bóknáms.
„Allir birgjar og atvinnulífið hafa tekið okkur opnum örmum og styrkt skólann með miklum velvilja. Staðið við bakið á okkur sem erum að mennta fólk í iðngreinum. Það skiptir öllu máli,“ sagði Ársæll en atvinnulífið hefur stutt vel við bakið á pípulagningadeildinni í formi gjafa og velvildar.
Að því loknu fékk Ásmundur að spreyta sig á pípulögnum og klippti svo loks á pípulagningaborða með Framsóknargrænum klippum og vígði nýja deild skólans undir dynjandi lófataki gesta. Hann bætti við að hann væri sérstaklega ánægður með litinn á klippunum.

Ráðherra, skólameistari, deildarstjóri og nemendur klippa á "borðann"

Kennarar og skólameistari Borgó ásamt fulltrúum Tengis

Nemendur og starfsfólk Borgó ásamt fulltrúm Tengis

Enn berast pípulagnadeild Borgarholtsskóla góðar gjafir, að þessu sinni frá Tengi ehf. sem er gamalgróið fyrirtæki í pípulagnabransanum. Veitti skólameistari Ársæll Guðmundsson skólameistari gjöfunum viðtöku að viðstöddum fulltrúum Tengis, nemenda á pípulagnabraut og fleiri góðum gestum.
Um er að ræða svokallað „Quick and easy“ kerfi sem er það nýjasta í pípulögnum í dag. Kerfið samanstendur af rörum, tengiboxum og tengidósum og er það frábrugðið eldri lagnakerfum að því leiti að ídráttarrör eru sett í veggi og gólf fyrirfram og hinar eiginlegu vatnsleiðslur eru dregnar í á síðari stigum byggingarframkvæmda.
Það voru þeir Arnar Árnason og Björn Ágúst Björnsson sem afhentu gjöfina fyrir hönd Tengis ehf. en Ársæll og Skarphéðinn Skarphéðinsson, deildarstjóri pípulagnadeildar, veittu þeim viðtöku. Að lokum var gestum boðið upp á gómsætar snittur af bestu gerð og gafst þá tækifæri til spjalls.

Ársæll tekur við gjöfinni af hálfu Borgarholtsskóla

Starfsmenn Byko komu færandi hendi í heimsókn í pípulagnadeild Borgarholtsskóla á dögunum. Færðu þeir skólanum að gjöf upphengjanleg salerni og allan búnað sem þarf til að setja tækin upp og tengja. Einnig gaf fyrirtækið skólanum blöndunartæki og annan tengdan búnað.
Það voru þeir Árni Kvaran og Guðjón Grétar Daníelsson sem mættu fyrir hönd Byko og veittu Ársæll skólameistari og Skarphéðinn, deildarstjóri pípulagna, gjöfinni viðtöku. Ársæll ítrekaði fyrri orð sín um mikilvægi samstarfs og samvinnu atvinnulífs og skóla og minnti á að markmið beggja aðila væri að efla sem mest og best fagmennsku og vönduð vinnubrögð í iðngreininni.
Að lokum þáðu gestir snittur og kaffisopa í Skarpaskjóli, hinni nýju og glæsilegu aðstöðu skólans til kennslu í pípulögnum.

Fulltrúi Byko og skólameistari handsala gjöfina

Velkomin í Borgó

Á næstunni

.

Grænmetislasagne og hvítlauksbrauð

Lasagne og hvílauksbrauð

Fréttir

TORG Listamessa

Heilsuvika

Eldstæði smíðað í stálsmíði