Pípulagnir

Markmið náms í pípulögnum er að gera nemendum kleift að vinna sjálfstætt að verkefnum sem iðngreininni tilheyra og leiðbeina öðrum. Mikilvægur þáttur í náminu er að efla sjálfsskilning, lýðræðislega hugsun og siðvitund nemenda þannig að þau séu undir það búin að sinna samfélagslegum skyldum sínum.

Eftir námið er gert ráð fyrir að viðkomandi kunni skil á helstu eiginleikum og verkan efna og tækja og geti valið þau eftir verkefnum. Viðkomandi getur lagt vatnshitakerfi og neysluvatnskerfi innanhúss og ýmis sérhæfð lagnakerfi, lagt frárennsliskerfi innanhúss og í jörðu, sett upp og tengt hreinlætis- og heimilistæki og sett upp og stillt búnað í tækjaklefum. Pípari getur annast viðhald og viðgerðir á lagnakerfum og búnaði tengdum þeim. Pípari getur leiðbeint húseigendum um val á efnum í nýbyggingum og við viðhald. Pípulagnir er löggilt iðngrein.

Nemendur geta lokið þeim hluta námsins sem kenndur er í skóla (120 einingum) á tveimur námsárum. Að þeim tíma loknum tekur við starfþjálfun á vinnumarkaði sem metin er til 60 eininga.

Að þessu námi loknu geta nemendur sótt um og þreytt sveinspróf í pípulagnir sem veitir starfsréttindi í faginu. Sveinsprófið veitir rétt til inngöngu í nám til iðnmeistaraprófs

Nemendur sem ekki ná A, B eða hærra en 7,0 í grunnskólaeinkunn íslensku og ensku þurfa að taka undibúningsáfanga í þeim fögum, ÍSL1A05 og ENS1A05.

Nemendur sem ekki ná A, B eða hærra en 7,0 í grunnskólaeinkunn í stærðfræði þurfa að taka undirbúningsáfanga, STÆ1A05.

Nemendur taka tvær einingar í íþróttum til viðbótar við þær sem eru í grunnnámi. Hægt er að velja eftirfarandi áfanga: RÆK1A01 – ræktin, JÓG1A01 – jóga, KÖR1A01 – körfubolti, FÓT1A01 – fótbolti og ÚTI1A01 – útivist. Velja má hvern þessara áfanga oftar en einu sinni og velja má fleiri en einn áfanga á önn.

Viðbótarnám til stúdentsprófs

Nemendur sem ætla að útskrifast með viðbótarnám til stúdentsprófs þurfa að taka eftirfarandi:

Kjarni

Nemendur þurfa að taka alla áfangana í kjarna

Bundið áfangaval

Nemendur velja 5 ein í ensku og/eða stærðfræði.
Nemendur velja annað hvort félagsfræði, náttúrufræði eða sögu sem viðbót (5 einingar).

Frjálst val

Nemendur nýta frjálst val til þess að fylla upp í þær 200 einingar sem þarf til stúdentsprófs. Nemendum er bent á að kynna sér vel þær kröfur sem gerðar eru til samsetningar stúdentsprófs í því námi sem stefnt er á í framhaldinu og haga vali á áföngum í samræmi við þær.
Náms- og starfsráðgjafar veita nánari upplýsingar um viðbótarnám til stúdentsprófs.

Athugið að einingar á 1. þrepi mega að hámarki vera 66, einingar á 2. þrepi mega að hámarki vera 100 og einingar á 3. þrepi þurfa að vera að lágmarki 34.