Nýnemavika
Dagana 6.-10. september var nýnemavika í Borgarholtsskóla. Þessa daga stóð Nemendafélagið í ströngu við skipulagningu ýmissa viðburða fyrir nýnemana.
Hápunktur vikunnar var nýnemaferðin sem var miðvikudaginn 8. september en í upphafi dags fengu allir nýnemar afhentar peysur merktar nemendafélagi skólans. Ekki þótti ástæða til að leita langt yfir skammt og var farið í Skemmtigarðinn í Gufunesi. Boðið var upp á minigolf og fótboltagolf í garðinum sjálfum og í Egilshöll var farið í lasertag og archerytag sem Skemmtigarðurinn sá jafnframt um. Að því loknu var boðið upp á pizzu og Jakob Birgisson kom og flutti uppistand.
Fimmtudagskvöldið 9. september var nýnemakvöld haldið í matsal skólans. Það kvöld var keppt í limbó og kappáti, boðið upp á pizzu, myndband með nýnemavakningum voru sýnd og rapparinn Daniil mætti.
Nýnemavikan tókst mjög vel og er stjórn NFBHS þakkað kærlega fyrir skipulagningu hennar. Í næstu viku verða nýnemaviðtöl á vegum nemendafélagsins og þá gefst gott tækifæri fyrir nýnema að gefa kost á sér í ýmsar nefndir sem starfræktar eru.