Vann landskeppni í eðlisfræði

20/3/2013

  • Ólympíukeppnin í eðlisfræði 2013

Pétur Rafn Bryde, 19 ára nemandi úr Borgarholtsskóla, varð hlutskarpastur í Landskeppninni í eðlisfræði um helgina. Undankeppni fór fram 26. febrúar með þátttöku 137 nemenda úr ellefu framhaldsskólum og var 14 efstu í þeirri keppni boðið í lokakeppnina.

„Ég hef bara mikinn áhuga á eðlisfræði. Áhuginn kviknar við að hafa gaman að þrautalausnum eins og þessi keppni snýst um og að skilja eðli hlutanna,“ segir Pétur í viðtali við Morgunblaðið. „Ég ætla að sjálfsögðu að taka þátt í Ólympíukeppninni í sumar í Kaupmannahöfn. Ég tók líka þátt í henni í fyrra, en þá varð ég í fjórða sæti í landskeppninni hér heima. Fimm hlutskörpustu keppendunum er svo boðið að taka þátt í Ólympíukeppninni í eðlisfræði sem haldin verður nú í sumar í Kaupmannahöfn."

Pétur Rafn Bryde varð hlutskarpastur í Landskeppninnar í eðlisfræði
Pétur er lengst til hægri á myndinni

Lokakeppnin skiptist í tvennt. Annars vegar var um að ræða fræðilegan hluta á laugardeginum en verklegan á sunnudeginum. Í fræðilega hlutanum hafa keppendur þrjá tíma til að leysa fimm strembin verkefni en í þeim verklega einn og hálfan til að greina og mæla misflóknar uppstillingar. Nemendur og kennarar við Háskóla Íslands sömdu keppnina en mörg þeirra eru fyrrum fulltrúar Íslands á Ólympíukeppninni. 

Aðspurður segir Pétur að keppnin hér heima sé ekki auðveld. „Keppnin í Kaupmannahöfn verður samt talsvert erfiðari. Þessi keppni er hálfgerður undirbúningur fyrir hana. Æfingar fyrir svona keppni felast aðallega í því að lesa eðlisfræðibækur, skilja lögmálin sem liggja að baki fræðunum, og svo þarf maður að æfa sig í þrautalausnum. Það gerir maður með því að leysa fullt af dæmum,“ segir Pétur.

Pétur varð sem fyrr segir hlutskarpastur í keppninni, en á hæla Péturs komu þau Jón Sölvi Snorrason, Snorri Tómasson, Tryggvi Kalman Jónsson og Hildur Þóra Ólafsdóttir úr Menntaskólanum í Reykjavík. „Það er kannski skemmtilegt fyrir skólann minn að ég vinni þetta. Borgarholtsskóli hefur ekki verið þekktur fyrir eðlisfræði og það mætti leggja meira upp úr henni. Kennarinn minn er samt mjög góður og hefur staðið sig vel í að vekja áhuga nemenda á eðlisfræði,“ segir Pétur.

Magnús Hlynur Haraldsson er eðlisfræðikennari í Borgarholtsskóla.


Hefur þú ábendingu um frétt?

Sendu okkur jákvæðar og skemmtilegar fréttir.

Lesa meira