Jafnréttisdagur og klámvæðing

17/3/2012

  • Klámvæðing

Á alþjóðlegum baráttudegi kvenna þann 8. mars var boðið upp á ýmsa viðburði víða um land. Meðal annars á vegum Jafnréttisstofu. Þeir sem vilja fræðast um sögu dagsins geta farið á vef Kvennasögusafns.

Klámvæðing, sem er hluti af jafnréttismálum, hefur einnig verið í umræðunni og hér fyrir neðan verða tekin tvö dæmi.

Kynferðisofbeldi í samböndum

Þann 12. mars var umfjöllun um klám og kynferðisofbeldi í samböndum í þættinum Ísland í dag á Stöð2. Í þættinum er rætt við stúlku og móður hennar. Inn í viðtalið var fléttað viðhorfi Hönnu Bjargar Vilhjálmsdóttur sem hefur kennt jafnréttisáfanga við Borgarholtsskóla.

Móðir unglingsstúlku segir að nauðganir í samböndum séu staðreynd. Dóttir hennar varð fyrir þessu ofbeldi í fjögur ár frá hendi kærasta síns þegar hún var 14-18 ára. Kærastinn horfði mikið á klámefni og stúlkan varð hræddari eftir því sem klámefnið sem hann horfði á varð grófara en samhliða því varð ofbeldið gegn stúlkunni grófara. Kærastinn þvingaði stúlkuna til að fara langt yfir hennar mörk í kynlífi. Á þessum tíma fann stúlkan fyrir líkamlegum og andlegum erfiðleikum.

Þeim fer fjölgandi sem leita til Stígamóta vegna kynferðisofbeldis í samböndum. Klámvæðingu er um að kenna segir Hanna Björg. Útlitsdýrkun og pressa í kynlífi laskar sjálfsmynd stúlkna. Hún segir að íslenskir krakkar byrji að horfa á klám 11-12 ára.

Hanna hefur boðið upp á  valáfanga í kynjafræði við Borgarholtsskóla sem hefur verið vinsæll meðal nemenda. Hanna berst fyrir því að kynjafræði verði kennd í öllum grunnskólum landsins.  

Hér má hlusta á viðtalið.

Klámvæðing er kynferðisleg áreitni

Þann 2. mars gáfu Mannréttindaskrifstofa Reykjavíkurborgar og MARK - Miðstöð margbreytileika- og kynjarannsókna við Háskóla Íslands út fræðslubæklingurinn „Klámvæðing er kynferðisleg áreitni". Höfundur bæklingsins er Thomas Brorsen Smidt, MA-nemi í kynjafræði við HÍ.

Bæklingurinn, sem er á íslensku og ensku, varpar ljósi á það hvernig konur upplifa klám á vinnustöðum og umræðu um útlit sitt í stað frammistöðu. Bæklingurinn gagnast öllum sem vilja vinna gegn klámvæðingu og kynferðislegri áreitni.

Klámvæðing er kynferðisleg áreitni - bæklingur (pdf).

Þessi umræða opnar vonandi augu allra fyrir þessum vanda.


Hefur þú ábendingu um frétt?

Sendu okkur jákvæðar og skemmtilegar fréttir.

Lesa meira