Landsliðsstyrkur afhentur

21/1/2019

  • Landsliðsstyrkur afhentur í janúar 2019

Miðvikudaginn 9.  janúar var landsliðsstyrkur afhentur nemendum afreksíþróttasviðs. Þau voru mörg og fjölbreytt verkefnin sem landsliðsfólk sviðsins tók þátt í fyrir áramót. Hér erum við með yfirlit þeirra verkefna frá því fyrir áramót.


Sigvaldi Örn blakmaður úr Aftureldingu var tvívegis valinn í landslið Íslands í blaki árið 2018. Hann var valinn í U-19 landsliðið sem tók þátt í NEVZA 2018 í Færeyjum í mars og í U-17 landsliðið sem tók þátt í NEVZA U-17 liða í Danmörku í október.

Magnús Gauti borðtennismaður ársins 2018 hjá sínu sérsambandi tók þátt í Evrópumóti fullorðinna í Alicante dagana 18. – 23. september. Mótið var afskaplega erfitt segir Magnús en víst að þarna hefur hann nælt sér í góða reynslu enda ungur að árum.

Þórunn Ásta borðtenniskona fór til Eistlands með unglingalandsliðinu að keppa við stöllur sínar af Norðurlöndunum síðasta sumar og er reynslunni ríkari eftir þá ferð.

Bergrún Ósk íþróttakona fatlaðra keppti  á Evrópumeistaramóti fatlaðra í Berlín. Þar tók hún þátt í fjórum greinum 400m (4. sæti), 200m (3ja sæti), 100m (3ja sæti) og langstökki (2. sæti) ásamt því að bæta persónulegan árangur í öllum greinunum.

Helga Þóra var valin til að taka þátt á Norðurlandamótinu U20 í Danmörku í Hvidovre þar sem hún tók þátt í  hástökkskeppni fyrir hönd Íslands og Danmerkur (sameiginlegt lið) og stökk hún 1,66 metra sem er aðeins frá hennar besta sem er 1,74m og endaði í 6. sæti.

Dagbjartur kylfingur keppti með landsliðsliði pilta á síðasta ári og vann sér inn rétt til þátttöku í A- deild  með árangri sínum. Dagbjartur hefur verið mjög duglegur að keppa undanfarið ár og hefur það gengið mjög vel og er hann m.a.  Íslandsmeistari í sínum aldursflokki 2 ár í röð og Klúbbmeistari GR.

Kristófer Karl golfari keppti fyrir Íslands hönd á EM í Búdapest. Þar tók hann þátt í liðakeppni þar sem þeir drengir lönduðu 3. sæti og komust upp í aðra deild.

Hafsteinn Óli, Goði Ingvar, Arnar Máni, Arnór Snær og Þorleifur Rafn handboltamenn tóku þátt með U18 ára landsliði Íslands á EM í Króatíu síðasta haust. Þar var árangurinn hreint út sagt frábær og hafnaði liðið í 2. sæti.

Axel Hreinn ásamt fleirum af afrekssviðinu keppti með U18 á Sparkassen móti með handboltalandsliðinu milli jóla og nýárs. Liðið hafnaði í 3ja sæti eftir gott mót.

Benedikt Gunnar keppti á æfingamóti með U-17 ára landsliðinu í handbolta. Leikið var í Lille í Frakklandi 24. – 28. október sl. Liðin sem tóku þátt voru, auk Íslands, Frakkland, Króatía og Sviss. Liðið vann einn leik, gerði eitt jafntefli og tapaði einum.

Þórður Jökull karatemaður keppti á tveim alþjóðlegum mótum með landsliði Íslands nú í haust. Í byrjun september keppti hann á Finnish Open Cup í Helsinki í tveim flokkum, í kata junior og í kata senior. Í lok nóvember keppti hann á Norðurlandameistaramótinu í karate í kata junior og hópkata karla (male team kata).

Jónína  Hlín handboltakona fór ásamt U18 ára landsliði kvenna til Púchov í Slóvakíu. Þar léku þær þrjá vináttulandsleiki við Slóvakíu. Þær töpuðu fyrstu tveimur leikjunum en sigruðu þann síðasta.

Brynjólfur Óli sundmaður fór fyrst til Argentínu að keppa á Youth Olympic Games sem var haldið í Buenos Aires í október. Þar keppti hann í 50 og 200m baksundi. Þá keppti hann á Norðurlandameistaramótinu sem var haldið í Finnlandi í 50, 100 og 200m baksundi, og komst inn í úrslit og bætti sig í 100 og 200m baki.

Ragna Sigríður sundkona fór á Norðurlandameistaramótið sem fór fram í Oulu í Finnlandi þar sem henni gekk vel og komst hún í úrslit með persónulegum bætingum.

Til hamingju öll!


Hefur þú ábendingu um frétt?

Sendu okkur jákvæðar og skemmtilegar fréttir.

Lesa meira