Grunnskólanemar í Borgó
Grunnskólanemendurnir eru mættir í málmskálann, en nemendum í 9.-10. bekk er boðið að koma í málmsmíði sem val í sínum skólum. Í ár verða um 80 nemendur úr 12 skólum á höfuðborgarsvæðinu í Borgarholtsskóla á föstudögum og mánudögum. Nemendurnir læra grunnatriði í að lesa teikningar, beygja málma, málmsuðu, rafeindatækni og spóntöku í rennibekk ásamt öryggisatriðum. Þau sem klára námið fá áfangann MSG172 metinn á framhaldsskólastigi í Innu. Í vetur munu nemendur vinna sérstaklega með sköpun. Þau eiga eftir að gera skartgripi úr gömlum 5 aurum, kertastjaka í CNC rennismíði sem þau hanna sjálf, steypa málma eftir eigin hönnun, gera rafrás og hanna yfirbygginguna sjálf og skera hana úr í plasmaskurðarvél og að lokum munu þau gera fígúrur með því að bræða saman málma í logsuðutækjum.