Samtökin
Samtök sálfræði- og uppeldisfræðikennara eru samtök þeirra kennara sem kenna sálfræði, upp-eldisfræði og skyldar greinar í framhalds-skólum landsins. Félagið heldur fræðslufundi og námskeið nokkuð reglulega. Félagsmenn fá upplýsingar um hvað er á döfinni í tölvupósti sem er orðin aðalsamskiptaleið stjórnar og félagsmanna. Vefur þessi er ein leiðin til að bæta upplýsingaflæði á milli félagsmanna.

Stjórn Samtaka sálfræði- og uppeldisfræðikennara

Stjórn félagsins var kosin á aðalfundi sem haldinn var

Laufey Ófeigsdóttir formaður laufey.ofeigsdottir@mk.is

Harpa Hafsteinsdóttir gjaldkeri harpah@mh.is

Hildur Jóhannsdóttir ritari hildur@fa.is

Ívar Rafn Jónsson meðstjórnandi ivar@bhs.is

Ingibjörg Ó. Sigurðardóttir meðstjórnandi ingibjorg@fsu.is

Aðalfundur samtaka sálfræði- og uppeldisfræðikennara, haldin 15. Nóvember 2008 í Kennarahúsinu við Laufásveg, kl. 18:00.

Fundarstjóri fundarins var Aldís Unnur Guðmundsdóttir.  Fundarstjóri setti fundinn og bauð alla velkomna fyrir hönd stjórn félagsins.

1. Skýrsla formanns.
Laufey las skýrslu formanns og fundargerð síðasta aðalfundar sem borin var upp til samþykktar og félagsmenn samþykktu einróma.

2. Reikningar lagðir fram.
Aron T. Haraldsson gjaldkeri lagði fram endurskoðaðan efnahags- og rekstrarreikning félagsins. Félagsmenn samþykktu reikninga einróma. Endurskoðandi var Hulda Birna.

3. Kosning stjórnar.
Aron T. Haraldsson vék úr stjórn félagsins og eru honum þökkuð góð og óeigingjörn störf í þágu félagsins sl. ár.  Ingibjörg Ó. Sigurðardóttir frá FSU kom inn sem meðstjórnandi og Harpa Hafsteinsdóttir stjórnarmeðlimur tók við gjaldkerastöðunni af Aroni.  Laufey er áfram formaður og Hildur er áfram ritari ásamt því að hún tók að sér umsjón heimasíðu félagsins

4. EFPTA.
Harpa Hafsteinsdóttir kynnti EFPTA samstarfið, sagði frá síðustu fundum.  Hún tilkynnti að Kristján Ari Arason hafi sagt sig frá skyldustörfum samtakanna en hann sá um heimasíðu þeirra.  Honum voru þökkuð vel unnin störf.  Harpa tók við starfi ritstjóra fréttabréfs EFPTA - nokkrar umræður sköpuðust um starfsemi EFPTA samtakanna og markmið með þátttöku félagsins í starfinu.  Harpa kynnti komandi ráðstefnu sem verður í Edinborg 16-19 apríl þar sem sjónum er m.a. beint að "jákvæðri sálfræði".  Margir fundarmanna lýstu yfir vilja til að sækja þá ráðstefnu og stefnt er á hópferð frá Íslandi.  Stjórn félagsins lagði fram eftirfarandi tillögu: þar sem ákveðið var á síðasta aðalfundi að halda áfram samstarfinu við EFPTA leggur stjórn félagsins til að hún fái umboð aðalfundar til að tilnefna sinn fulltrúa til þátttöku á stjórnarfundum EFPTA.  Tillagan var samþykkt samhljóma.

5. Sumarnámskeið 2009
Hildur Jóhannsdóttir tók að sér að sjá um sumarnámskeið 2009.  Í ljósi væntanlegra breytinga á námskrá framhaldsskólastigsins er ætlunin að taka fyrir námsmat og var sú tillaga lögð fram af hálfu stjórnar.   Jafnframt var óskað eftir tillögum fundarins um inntak sumarnámskeiðs og skapaðist mikil umræða. Úr varð að reynt verður að samræma eftirfarandi; nýjir straumar; jákvæð sálfræði - ný námskrá; breytt starfsumhverfi – námsmat

7. Önnur mál
Anna Jóna Guðmundsdóttir gekk fram og hélt erindi um "jákvæða sálfræði".  Anna Jóna hefur kynnt sér þau fræði undanfarin misseri og ætlar að búa til áfanga með því inntaki.  Hún tilkynnti að hún hygðist sækja um styrk til Menntamálaráðuneytis vegna námsefnisgerðar honum tengdum og óskaði eftir stuðningi fundarins við umsókn sína.  Fundarmenn lýstu yfir stuðningi sínum.  Kristján Ari lagði til að stjórn félagsins myndi beita sér fyrir því að sálfræðikennarar í framhaldsskólum myndu koma að málum Lífsleikninnar innan sinna skóla.  Laufey minnti á lokadagsetningu umsókna til námsefnisstyrkja sem er 24. Nóvember.  Guðmunda hvatti félagið til að hvetja sína félagsmenn til að nýta breytingarnar sem væntanlegar eru innan framhaldsskólastigsins og halda vel á spöðunum.  Að félagsmenn ættu að vera sýnilegir í mótun námskrá sinna skóla gagngert til að hafa áhrif. 

Ekki var fleira rætt og fundi var slitið kl. 20:00

Fundargerð ; Hildur

Aðalfundur samtaka sálfræði- og uppeldisfræðikennara, haldin 25. nóvember 2005 í Skólabæ við Suðurgötu.

Lilja Ósk Úlfarsdóttir formaður setti fundinn og bauð félagsmenn velkomna.

1. Skýrsla formanns.
Lilja las skýrslu formanns og fundargerð síðasta aðalfundar sem borin var upp til samþykktar og félagsmenn samþykktu einróma.

2. Reikningar lagðir fram.
Aron T. Haraldsson gjaldkeri lagði fram endurskoðaðan efnahags- og rekstrarreikning félagsins. Félagsmenn samþykktu reikninga einróma. Endurskoðandi var Þórður Sigurðsson.

3. Kosning stjórnar.
Stjórn síðasta árs ákvað áframhaldandi stjórnarsetu þar sem ekkert mótframboð barst og var endurkjör stjórnar einróma samþykkt.

4. Sumarnámskeið 2006
Laufey Ófeigsdóttir ritari kynnti efni sumarnámskeiðs sem haldið verður dagana 9.-11.ágúst 2006.
Viðfangsefni námskeiðsins að þessu sinni verða straumar og stefnur í afbrigðasálfræði með áherslu á andlegt heilbrigði og streitu.

5. Ferð félagsmann til Barcelóna
Aldís Guðmundsdóttir meðstjórnandi greindi frá ferð félagsmanna á ráðstefnu EFPTA sem haldin var í Barcelona 4.-5. nóvember 2006. Alls fóru frá Íslandi 18 manns á þessa fyrstu ráðstefnu samtakana. Þótti ráðstefnan takast í alla staði mjög vel. Sérstakur gestur ráðstefnunnar var Michael Eysenck sálfræðingur frá Englandi. Kynnt var staða sálfræðinnar í hinum ýmsu löndum og út frá þeirri kynningu varð ljóst að staða sálfræðikennslu á Íslandi stendur nokkuð sterk miðað við mörg þeirra landa.

6. EFPTA
Aldís kynnti komandi fundi EFPTA á næstu 2 árum en stjórn samtakana kemur til með að hittast tvisvar á árinu 2006 og í Reykjavík í apríl 2007. Ráðstefna á borð við þá sem haldin var í Barcelona verður síðan haldin í einhverju Eystrarsaltslandanna haustið 2007. Aldís og Kristján Ari Arason meðstjórnandi hafa ákveðið að draga sig úr stjórn samtakana eftir stjórnarfundin í Reykjavík 2007. En mikið hefur mætt á þeim og hafa þau bæði unnið mikið og óeigingjarnt starf í þágu þessara nýju samtaka.

7. Önnur mál
Lilja kynnti 5 eininga námskeið sem Háskóli Íslands hyggst bjóða upp á fyrir starfandi framhaldsskólakennara sem unnt verður að fá metið upp í Mastersnám. Stytting náms til stúdentsprófs var rædd m.t.t. sálfræðinnar og hugsanlegra breytinga á faginu í kjölfarið. Kristján Ari sagði stuttlega frá tillögum starfshóps á vegum Menntamálaráðuneytisins þar um. Námsefni og námsefnisgerð í sálfræði var rædd og sú hugmynd að kennarar skiptust á hugmyndum að t.d. efni, kennsluaðferðum og vefslóðum og því komið inn á heimasíðu félagsins með aðstoð Kristjáns Ara eða með því að senda tillögurnar á netföng félagsmanna.

Fleira var ekki rætt.
Formlegum fundi slitið klukkan 19:00

Fundargerð ; Laufey

Aðalfundur félags sálfræði- og uppeldisfræðikennara, haldinn 20. nóvember 2004 á Hótel Borg í Reykjavík.

Aldís Guðmundsdóttir setti fundinn og bauð núja meðlimi og heiðursgest velkomin.

1. Skýrsla stjórnar.
Aldís las skýrslu stjórnar, og fundargerð síðasta aðalfundar.

2. EFPTA samtökin voru kynnt.
Lilja Ósk Úlfarsdóttir sagði frá vinnufundi EFPTA í Cambridge 5. – 7. nóvember 2004. Fundarmenn klöppuðu fyrir stjórnarmeðlimum fyrir góða frammistöðu í Cambridge þar sem Aldís Guðmundsdóttir var kosin ritari og Kristján Ari fenginn til að sjá um heimasíðu samtakanna. Skýrsla hefur verið sett á heimasíðu félagsins sem tímabundið er vistuð á slóðinni: http://www.ismennt.is/not/krisara/UPPminSAL/index.htm.

3. Heimasíða Upp Mín Sál.
Kristján Ari kynnti heimasíðu sem hann hefur unnið fyrir félagið. Síðan var formlega opnuð. Fundarmenn lýstu ánægju með síðuna og klappað var fyrir Kristjáni Ara.
Ákveðið var að senda félagsmönnum slóð vefsíðunnar. Kennarar geta sent Kristjáni slóð á efni sem þeir eiga og vilja deila með öðrum. Ekki verður settur upp læstur gagnagrunnur á heimasíðu félagsins eins og komið hafði til tals áður. Fremur munu kennarar sjálfir sjá um að læsa því efni sem þeir vilja hafa læst.

5. Reikningar lagðir fram.
Kristján Ari lagði fram endurskoðaðan efnahags- og rekstrarreikning félagsins. Fundur samþykkti reikninga. Ákveðið var að Kristján ætti að fá greiðslu fyrir að halda við og vinna að vefsíðu áfram. Hugað verður að hvort félagið hefur efni á því.

6. Kosning nýrrar stjórnar.
Aldís verður frá næsta misseri en verður áfram stjórnarmeðlimur. Hrefna hættir störfum. Aron verður áfram gjaldkeri. Kristján verður laustengdur stjórn, Lilja verður formaður og nýr stjórnarmeðlimur er Laufey Ófeigsdóttir.

7. Heiðursgestur Árni Kristjánsson hélt erindi ,,Túlkun og reynsla í sjónskynjun”.
Erindið var skemmtilegt og því var tekið með áhuga og ánægju af fundarmönnum.

Fleira var ekki rætt.
Formlegum umræðum hætti kl. 19:45.

Fundargerð: LÓÚ.

Skýrsla formanns fyrir hönd stjórnar félags sálfræði- og uppeldisfræðikennara á aðalfundi laugardaginn 20. nóvember 2004

Síðasti aðalafundur:

Síðasti aðalfundur félagsins var haldinn laugardaginn 22. nóvember 2003 á Hótel 101 Reykjavík við Ingólfsstræti í Reykjavík. Auk hefðbundinna aðalfundarstarfa voru ýmis mál rædd á fundinum, einkum hvað varðar stöðu sálfræðinnar á framhaldsskólastigi. Gestur fundarins var Einar Guðmundsson dóesent og skorarformaður sálfræðiskorar HÍ. Hann lýsti yfir stuðningi við sálfræðikennslu í framhaldsskólum og las bréf þar að lútandi sem kennarar í sálfræðiskor höfðu skrifað undir og sent aðilum sem málið snerti. Vísast hér til fundargerðar síðasta aðalfundar.

Fundargerð lesin

Störf stjórnar:

Stjórn félagsins hefur haldið nokkra fundi á árinu og skipst reglulega á upplýsingum í gegnum tölvupóst þar fyrir utan. Stjórnin hefur haft í ýmsu að snúast, m.a. tekið þátt í stofnun Evrópusamtaka sálfræðikennara. Eitt af þeim verkefnum sem stjórninni var falið að koma í kring var að setja upp nýja heimasíðu félagsins. Kristján Ari Arason hefur séð um gerð hennar og mun kynna hana hér á eftir. Jafnframt var stjórninni falið að undirbúa sumarnámskeið með áherslu á SÁL 203.

Sumarnámskeið:

Umsjón með sumarnámskeiði hafði Lilja Ósk Úlfarsdóttir. Námskeið var haldið fyrir sálfræði- og uppeldisfræðikennara í framhaldsskólum og bar titilinn „Straumar og stefnur í þroskasálfræði – veruleiki íslenskra barna“. Áhersla var lögð á bæði þroskasálfræði og uppeldisfræði. Námskeiðið fór fram í Kvennaskólanum frá 11. til 13. ágúst 2004 — kl. 9–16:30 alla dagana.

Samkvæmt námskeiðslýsingu var markmið námskeiðsins að kynna nýja strauma og stefnur í þroskasálfræði með tilliti til íslensks veruleika og þeirra aðstæðna/umhverfis sem íslensk börn/ungmenni búa við. Kennarar á námskeiðinu voru Einar Guðmundsson HÍ, Lilja Úlfarsdóttir Kvennaskólanum, Zuilma Gabriela Sigurðardóttir HÍ, Bragi Guðbrandsson forstjóri Barnaverndarstofu og Hildigunnur Gunnarsdóttir Kvennaskólanum sem kynnti kennslubók sem hún hefur í smíðum um uppeldisfræði. Námskeiðið var vel sótt og þótti takast vel. Þess má geta að einmuna blíða var í Reykjavík meðan á námskeiðinu stóð og gátu þátttakendur notið borgarstemningarinnar í hádegishléi.
Sjá nánar um sumarnámskeiðið 2004.

EFPTA:

Evrópusamtök sálfræðikennara á grunn- og framhaldsskólastigi voru formlega stofnuð 28. mars 2004 en 5. til 7. nóvember s.l. var haldinn sérstakur vinnufundur samtakanna í Cambridge í Englandi. Þrír meðlimir stjórnar sóttu fundinn og mun Lilja Úlfarsdóttir segja nánar frá honum hér á eftir. Þess má geta að sálfræðikennslu vex víðast hvar fiskur um hrygg í Evrópu um þessar mundir. Sem dæmi má nefna að núna 2004 var sálfræði í 5. sæti yfir greinar sem nemendur í Stóra-Bretlandi taka til stúdentsprófs eða „A-level“. Hefur þeim fjölgað jafnt og þétt á síðustu árum. Einnig má geta þess að í Finnlandi verður sálfræði gerð að skyldugrein á öllum brautum á næsta ári. Samkvæmt upplýsingum frá formanni sálfræðikennara í Danmörku er verið að styrkja sálfræðina en verið er að endurbæta skólakerfið þar. Skýrslu um endurbæturnar er að vænta í lok þessa mánaðar. Einhver dæmi eru þó þess að greinin eigi undir högg að sækja, kom það m.a. fram á framangreindum fundi í máli formanns þýsku sálfræðikennarasamtakanna sem sagði þá þurfa stöðugt að standa vörð um hag greinarinnar.

Samstarfsnefnd um endurmenntun:

Þriðjudaginn 2. nóvember síðastliðinn sat formaður fund samstarfsnefndar um endurmenntun framhaldsskólakennara, formanna fagfélaga og skólamálanefnda FF og FS. Þar komu fram ýmsar hagnýtar upplýsingar og leiðbeiningar um gerð námskeiða. Einnig var bent á að kennurum getur staðið til boða að sækja um styrk til nefndarinnar um endurmenntun, m.a. í tengslum við M.Paed. nám. Minnt er á að sækja þarf um styrk fyrir 1. desember eigi að halda sumarnámskeið.

Námskeið og ráðstefnur á næsta ári:

Stjórn félagsins leggur til að á næsta ári verði ekki haldið hefðbundið sumarnámskeið heldur verði félagsmenn hvattir til að sækja ráðstefnur og námskeið á erlendri grundu. Lilja Ósk mun gera grein fyrir þeim hér á eftir.

Niðurlag:

Ekki er ástæða til að tíunda frekar um starf félagsins á árinu en félagsmenn hvattir til að halda áfram lifandi samskiptum sín á milli og standa vörð um greinina í sínum skólum og á sínu skólastigi. Að lokum minni ég á verkefnið Ungir vísindamenn á Íslandi en um það má lesa á heimasíðu Rannsóknarþjónustu Háskólans:

• http://www.evropusamvinna.is/id/1001653

Þar eru tengiliðir fyrir verkefnið í flestum framhaldsskólum.

Reykjavík 20. nóvember 2004
Aldís Guðmundsdóttir, fyrir hönd stjórnar

Styrkur frá ráðuneyti
Samtökin fengu í október 2005 styrk frá menntamála-ráðuneytin til að styrkja faglegt samstarf sálfræðikennara og vinna að námskrárgerð. Styrkurinn nýtist meðal annars til samstarfs innan EFTPA.

Brandarahornið
"Drengur fær slæmar einkunnir og segir við pabba sinn: Hvort heldur þú að umhverfið eða erfðirnar valdi þessu?"