Lög Samtaka sálfræði- og uppeldisfræðikennara
Samþykkt á stofnfundi 8. okt 1983 og breytt 20. okt 1989.
Lög fyrir Samtök sálfræði og uppeldisfræðikennara.

1. gr.
Félagið heitir Samtök sálfræði og uppeldisfræðikennara.

2. gr.
Markmið samtakanna er að efla kennslu í sálfræði og uppeldisfræði á öllum skólastigum. Markmiði þessu hyggst félagið ná:

• með því að stuðla að bættum starfsskilyrðum þeirra sem kenna sálfræði, námstækni og uppeldisfræði.
• með því að fylgjast með nýjungum í þessum greinum og stuðla að því að kennarar taki virkari þátt í að móta kennsluna, inntak hennar og aðferðir.
• með því að láta sig varða menntun sálfræði og uppeldisfræðikennara.
• með því að hafa samvinnu við þá sem semja námsskrár og námsefni í þessum greinum.
• með því að leita tengsla við kennara og kennarafélög erlendis t.d. með kynnisferðum.
• með því að stuðla að endurmenntunarnámskeiðum, ráðstefnuhaldi og afla upplýsinga um námskeið erlendis.

3. gr.
Félagssvæðið er landið allt.

4.gr.
Allir sem fást við kennslu í námstækni, sálfræði og uppeldisfræði á framhaldsskólastigi geta orðið félagsmenn.

5. gr.
Stjórn félagsins skipa 3 menn, formaður, ritari og gjaldkeri. Skulu þeir kosnir til eins árs í senn. Stjórnin skipti með sér verkum. Einnig skulu kosnir á aðalfundi þrír varamenn í stjórn og tveir endurskoðendur. Ef atkvæði falla jöfn skal varpað hlutkesti.

6. gr.
Stjórnin getur sett nefndir til ýmissa starfa og gengist fyrir stofnun deilda og/eða starfshópa eftir þörfum.

7. gr.
Aðalfund skal halda árlega í október. Á dagskrá skal vera:
a) skýrsla stjórnar
b) lagabreytingar
c) reikningar
d) kosning stjórnar
e) ákvörðun félagsgjalda
f) önnur mál
Einfaldur meirihluti ræður úrslitum mála.

8. gr.
Stjórnin getur boðað til aukafunda. Auk þess getur fjórðungur félagsmanna krafist aukafundar.

9. gr.
Lögum verður aðeins breytt á aðalfundi. Tillögur um lagabreytingar skulu berast stjórn eigi síðar en 15. september. Allar tillögur um lagabreytingar skal kynna í fundarboði. Boða skal aðalfund með 2ja vikna fyrirvara.