Fréttir
Haukur Helgi til Bandaríkjanna
Fyrrum nemandi af afrekssviði Borgarholtsskóla í körfubolta, Haukur Helgi Pálsson, hefur gert munnlegt samkomulag við Maryland háskólann í Bandaríkjunum um að leika með körfuboltaliði skólans ásamt því að stunda þar háskólanám.
Maryland háskólinn er einn sá virtasti í körfuboltanum í bandarísku háskóladeildinni og vann til að mynda bandaríska meistaratitilinn fyrir 8 árum. Þetta er í fyrsta sinn sem Íslendingur fer í skóla með svona öflugt körfuboltalið en á hverju ári fara margir útskriftarnemar liðsins að leika í NBA deildinni.
Haukur Helgi gat valið úr mörgum sterkum skólum en ákvað að slá til að fara í Maryland háskólann. Námslega séð er skólinn einnig gríðarlega virtur og mikils metið telst að hafa háskólagráðu þaðan.
Haukur Helgi var lykilmaður í körfuboltaliði Fjölnis og íslenska unglingalandsliðinu sem varð einmitt Norðurlandameistari á síðasta ári. Þá var Haukur Helgi valinn besti leikmaður Norðurlandamótsins.
Myndin er fengin af vef Körfuknattleikssambands Íslands kki.is.
