Skólasóknarreglur
- Nemendum er skylt að mæta stundvíslega í allar kennslustundir samkvæmt stundaskrá. Nemendur skulu sjálfir fylgjast með viðveruskráningu sinni í skráningarkerfi skólans.
- Fari mætingahlutfall á önn undir 85% í einstökum áfanga telst nemandi fallinn í áfanganum. Það sama gildir fari raunmæting í áfanga undir 70%. Nemanda er veitt áminning ef hann nálgast þessi mörk en ef ekki verður breyting til batnaðar skal honum vísað úr viðkomandi áfanga. Með mætingahlutfalli á önn er átt við viðveru nemanda að frádregnum heimilum fjarvistum (veikindum, töfluárekstrum og leyfum) og er það hlutfallið sem birtist á einkunnablöðum. Með raunmætingu er hins vegar átt við þær kennslustundir sem nemandi hefur sannarlega sótt.
- Í einstökum áföngum, þar sem símat og/eða viðvera liggur að baki einkunnagjöf, er heimilt að setja strangari reglur um heildarfjarvistir og skal þess þá getið í kennsluáætlun.
- Hafi nemandi í fullu námi 95% raunmætingu fær hann eina námseiningu á viðkomandi önn.
- Veikindi þarf að tilkynna á skrifstofu fyrir kl. 10.00 dag hvern sem þau standa yfir. Forráðamenn nemenda undir sjálfræðisaldri þurfa að tilkynna veikindi þeirra. Veikindi á prófatíma þarf líka að tilkynna samdægurs.
- Sé um ítrekuð veikindi að ræða geta skólastjórnendur farið fram á að nemandi geri grein fyrir veikindum sínum t.d. með því að framvísa vottorði.
- Skólameistari getur veitt undanþágu frá skólasóknarreglum vegna sérstakra aðstæðna nemanda. Sótt er um undanþáguna skriflega og þarf foreldri/forráðamaður ólögráða nemenda að sækja um fyrir hans hönd. Fjarvistir vegna ferða á vegum skólans, keppnisferða landsliða og þátttöku í Evrópukeppni eru alltaf felldar niður. Ekki er veitt undanþága vegna læknisheimsókna, tannlæknaheimsókna, skemmtiferða eða annarra tilfallandi fjarvista.
