Í Borgarholtsskóla er öflugt leiklistarstarf. Boðið er upp á allt að sjö áfanga í leiklist en tveir kennarar á lista- og fjölmiðlasviði annast kennsluna. Nemendum er gefin innsýn í leiklistarheiminn, byrjað á grunnatriðum í spuna og leikhússporti með áherslu á líkams- og raddbeitingu, grunnur lagður að vinnu við persónusköpun og unnið með ljóð. Auk áframhaldandi verklegrar þjálfunar í framsögn, öndun og raddbeitingu eru straumar og stefnur og mismunandi form leikritunar skoðuð og rýnt í texta frá mismunandi tímabilum og unnið með texta klassískra höfunda. Á síðari stigum námsins eru nemendur þjálfaðir í leikritun, undirbúningi og sviðssetningu lengri og styttri sýninga, gefin innsýn í starfsemi menningarstofnana, leikstjórn og margt fleira sem nýtist þeim til undirbúnings fyrir inntökupróf í listaháskóla.