Nám og kennsla á braut fyrir aðstoðarfólk í leik- og grunnskólum er byggt upp með áföngum í uppeldis-, félags-, sál-, siðfræði og skyldum greinum. Hluti námsins er almennt bóknám en meginuppistaða þess eru sérgreinar sem lúta að samskiptum og samstarfi ásamt umönnun og daglegu starfi með börnum. Námið nær einnig til leiðbeininga um heilbrigði og holla lífshætti. Nám skólaliða er 36 einingar. Nám stuðningsfulltrúa er 62 einingar og nám fyrir leiðbeinendur í leikskólum er 59 einingar.

Inntökuskilyrði: Nemendur skulu hafa hlotið einkunnina 5 í íslensku og stærðfræði á grunnskólaprófi. Skólmeistara er heimilt að veita nemendum sem hafa náð 18 ára aldri inngöngu þótt þeir uppfylli ekki ofangreind skilyrði. Nauðsynlegt er að skila með umsókn öllum gögnum um fyrri skólavist.

Skólaliðabraut (SK) 36 ein.

Skólaliðabraut býr nemendur undir störf í grunnskólum, einkum við gangagæslu, umsjón með börnum í útivist og á matmálstímum, þrif, almenn eftirlitsstörf og umsjón með skólahúsnæði. Meðalnámstími er tvær annir í skóla að meðtalinni þriggja vikna starfsþjálfun í grunnskóla.

Námsbraut fyrir stuðningsfulltrúa í grunnskólum (SG) 62 ein.

Námsbraut fyrir stuðningsfulltrúa í grunnskólum býr nemendur undir störf í grunnskólum þar sem þeir starfa við hlið annars faglærðs starfsfólks að umönnun, uppeldi og menntun barna á aldrinum sex til sextán ára. Meðalnámstími er þrjár annir í skóla að meðtalinni níu vikna starfsþjálfun í grunnskóla.

Námsbraut fyrir leikskólaliða (LL) 59 ein.

Námsbraut fyrir leikskólaliða býr nemendur undir störf á leikskólum þar sem þeir starfa við hlið annars faglærðs starfsfólks að umönnun, uppeldi og menntun leikskólabarna. Meðalnámstími er þrjár annir í skóla að meðtalinni níu vikna starfsþjálfun í leikskóla.