Margmiðlun: Verkstæði

Margmiðlun: Verkstæði

Vor 2010

Kennarar: Hafdís Ólafsdóttir, Ingibjörg Friðriksdóttir og Margrét Rósa Sigurðardóttir.

Lýsing:

Í áfanganum vinna nemendur að sjálfstæðum verkefnum á sviði margmiðlunarhönnunar. Þeir skilgreina verkefni á sínu áhugasviði í samráði við kennara. Ef um viðameiri verkefni er að ræða er sá möguleiki fyrir hendi að fleiri en einn standi að sama verkefni. Áhersla er lögð á að nemendur sýni agað og skipulagt vinnuferli frá fyrstu hugmynd til lokafrágangs hönnunarverkefnis. Samhliða eigin verkefnavinnu gagnrýna nemendur verkefni hver annars. Áfanganum lýkur með viðamiklu lokaverkefni nemanda.

Áfanginn er kenndur í 12 tíma á viku út önnina.

Meginmarkmið:

Nemandi

• geti unnið nokkuð viðamikil verkefni á margmiðlunarformi
• sýni færni í að fjalla um eigin hugmyndir á gagnrýninn hátt
• geti beitt sér af rökfestu við að greina og gagnrýna hugmyndir og vinnu annarra á sviði margmiðlunar

Kennsluaðferðir

Námið er fjölbreytt í áfanganum og skiptist í grófum dráttum í tvo fasa:

1) Verkstæðisvinnu : Hér fer verkefnavinna nemenda fram. Nemendur vinna að verkefnum samkvæmt eigin skilgreiningum og fer þessi vinna fram í þremur þrepum:
a) Skilgreining verkefna: Hér gera nemendur upp við sig hverskonar verkefni þeir ætla að kljást við og gera um það samkomulag við kennara.
b) Frumhönnun og hugmyndavinna: Þegar verkefni hefur verið skilgreint þurfa nemendur að skipuleggja verkefni mjög vel áður en þeir hefja framkvæmd þess. Nemendur gera verkáætlun þar sem verkefnum er skipt niður í verkþætti.
c) Framkvæmd verkefnis: Hér útfæra nemendur verkefni sín út frá þeim hugmyndum sem þeir hafa áður mótað. Í lok hvers verkefnis þurfa nemendur að ganga frá því tilbúnu til kynningar.

2) Greiningu og mat: Hér er um að ræða hugmyndafræðilegan stuðning við verkefni nemenda. Vinna þessi er fjölbreytt og margþætt:
a) Umræða um hönnunarferlið: Nokkrum sinnUM yfir önnina ræða nemendur og kennari sín á milli um eðli og aðferðir hönnunarferlisins. Þetta er nokkurs konar hugmyndafræðileg úttekt á þeirri vinnu sem á sér stað og undirbúningur undir frekari vinnu nemenda.
b) Skilgreining á stöðu verkefna í vinnslu: Tvisvar sinnum á meðan á vinnslu verkefnis stendur þurfa nemendur að gera grein fyrir stöðu vinnu sinnar við verkefnið og ræða hana við aðra nemendur. Þetta á sér stað þegar frumhönnun og hugmyndavinnu er lokið, annars vegar, og á miðju ferli framkvæmdar verksins.
c) Greinargerð við skil verkefna: Þegar skil verkefna eiga sér stað þurfa nemendur að fjalla um verkefnið og þær hugmyndir sem að baki því búa. Þetta er grundvöllur munnlegrar kynningar á verkefninu en þarf auk þess að skila skriflega.

Einkunnagjöf er tvíþætt fyrir hvert verkefni:

A. (²/₃ einkunnar) Mat á verklegum árangri.

• Mynd- og uppbyggingu, þ.m.t. tilfinningu nemanda fyrir myndbyggingu, meðferð og samspil myndefnis og texta og tengingar á milli einstakra þátta verksins.
• Hugmynd og hönnun, hversu vel umgjörð hæfir innihaldi verks, hugmyndaauðgi og frumleika.
• Virkni á vinnuferli og fylgni í samræmi við skipulag
  

B. (¹/₃ einkunnar) Mat á kynningu og þátttöku í umræðum.

Einkunn fyrir hvorn þátt er gefin á skalanum 1–10.

Mætingar

Nemandi telst fallinn í áfanganum ef heildarfjarvistir hans á önninni vegna veikinda, leyfilegra og óleyfilegra fjarvista eru meira en 20% af heildarstundafjölda áfangans.

Nemandi er skráður fjarverandi í kennslustund ef 10 mínútur eru liðnar frá upphafi hennar. Ef nemendur mæta seinna en 10 mínútum eftir upphaf kennslustundar eru þeir vinsamlegast beðnir að bíða úti þar til næsta kennslustund hefst.