Hljóðbókin er mikilvæg öllum sem af einhverjum orsökum eiga í lestrarerfiðleikum.  Hún nýtist m.a. þeim sem lesa hægt, stríða við einbeitingarskort og/eða hafa lítið úthald við lestur.

Leiðbeiningar um niðurhal hljóðbóka

Námsmönnum gefst kostur á að sækja hljóðbækur af vef  Blindrabókasafns Íslands og vista í tölvu. Greining sem staðfestir vanda í lestri tryggir aðgang að þessari þjónustu safnsins.  Flestir nemendur eru greindir í grunnskóla og senda skólarnir bréf til safnsins með ósk um að skrá þá sem safnnotendur. Nemendur sem eru með greiningarpappíra undir höndum en eru ekki skráðir lánþegar Blindrabókasafnsins geta óskað eftir að dyslexíuráðgjafi Borgarholtsskóla sendi safninu slíka staðfestingu.

Til að fá aðgang (lykilorð) verða námsmenn að hafa samband við safnið (sími: 545 4916). Starfsfólk safnsins lætur þeim í té lykilorð sem notað er við niðurhalið. Frekari leiðbeiningar um niðurhalið má finna í skjali á heimasíðu Blindrabókasafnsins: http://www.bbi.is/media/frettir//LEIDBEININGAR_UM_NIDURHAL.doc  

Í stuttu máli er ferlið svona:

1. Þú ferð á heimasíðu safnsins www.bbi.is og smellir á Hljóðbókaleit.

2. Því næst smellir þú á Innskráning.

3. Þú slærð inn kennitölu þína og lykilorð og smellir á Áfram.

Nú ertu skráð/ur inn og getur slegið nafn bókarinnar sem þú ætlar að ná í inn í leitargluggann og smellir svo á Leita. Bókin birtist þá sem lína neðar á skjánum.

Þú smellir á línuna og færð þá frekari upplýsingar um bókina. Því næst smellir þú á Hala niður.

Þá ertu beðin(n) að lesa skilmála fyrir niðurhali og samþykkja þá. Blað um skilmála er á heimasíðu safnsins.

Þar með fer af stað ferli á safninu þar sem búið er til sérstakt eintak fyrir þig. Gott er að panta nokkrar bækur samtímis t.d. að morgni og sækja þær t.d. eftir hádegi.

Þegar þú sérð að bókin er tilbúin til niðurhals á listanum smellir þú á Hala niður. Ferlið tekur oftast nokkrar mínútur.